نوکیں عَہد ءُ مئے شاعری - اِسحاق خاموشؔ
نوکیں عَہد ءُ مئے شاعری
________ اِسحاق خاموشؔ
نوکیں عہد ءَ شاعری ءِ زید ءُ زمانگ ءَ ماں بلوچ ءِ شاعری ءِ آزمان ءَ وتی دْرپش ءُ دْروشم بدل کُتگ اَنت ءُ آئی ءِ بُنھِشت ءِ تہا پد نوکیءِ ہواریں دَرسما ساہ زُورگ ءَ اِنت ءُ دگہ نیمگے بنیادمءِ ہمکروچی زِند ءِ جتاجتائیں کِرد ءُ کار ءُ چِست ءُ ایر ہم ہَوار کپتگ اَنت گوں۔
اگاں گوں ہُورت نگاہی ءَ چارگ بہ بیت تہ مئے نوکیں عہدءِ شاعری گوں ہچ ہاسیں وڑے ءِ پِگر، جُنز یا لیکہے ءَ گوں ہمگْرنچ نہ اِنت۔آ، چہ وتی کُلّیں لیکہی ءُ جُنزی پاد بندیاں آجو گندگ بیت۔مرچیگیں شاعرءَ چہ وتی بالاد ءَ ربیدگی، چاگردی، لیکہی ءُ پگری چادرءَ کشّ اِتگ ءُ دؤر داتگ۔آ، گوں مرچیگیں عہد ءَ، گوں پگری رُست ءُ ردوم ءَ دیم پہ دیم اِنت ءُ نشتگ ءُ گپّ ءُ تْران ءَ اِنت۔ہمے گپّ ءُ تْران آئی ءَ برے گوں نفسیاتی گِرءُ کشّ ءَ ماں شُولّین اَنت ءُ برے آئی ءَ بے معنائی ءُ جتارنگی ءُ گِستاءِگی ءِ پیچ ءُ تابانی تہا برنت ءُ سر کننت۔ مرچیگیں شاعر وتی اندر ءِ چیر ترّّ اِتگیں واہ ءُ زار ءُ کوکاّراں زُبان دَیگ لُوٹیت.......کہ ہمے واہ ءُ زار ءُ کوکار برے راجدوستی ءِ نام ءِ سرا،برے وت پسندیءِ نام ءِ سرا، برے نیکراہ ءِ نام ءِ سرا ، برے لیکہی ہوار کاری ءِ نام ءِ سرا ءُ برے جندی نپ ءُ سیتّانی نام ءِ سرا چیر ترّینگ بُوتگ اَنت۔۔۔۔۔ ءُ پدا گار ءُ بیگْواہ کنگ بُوتگ اَنت۔نوکیں عہد ءِ شاعری ءِ ندارگ ماں بلوچی شاعری ءِ آزمان ءَ گوں یک نوکیں داب ءُ دْروشمے ءَ ودی بُوہان اِنت۔
مرچیگیں شاعرءِ دیما بازیں جُستے ءَ چو کوہ ءَ سر چِست کُتگ، چہ ہمے جُستانی پیشانی ءَ ، بے تاہیری ءُ تہ پْرشتگی ءِ جاور سَہرا ءُ پدّر اَنت۔چاگردی ، پِگری پرک ءُ درک ءِ چاگرد ءَ یک وت ماں وتی گِر ءُ چیل ءِ کِسّہ یے ودی کُتگءُ ہمے کِسّہ ءِ آتْراپ ءَ آس ءِ بْرانزبُرز تر بُوہان اِنت۔ چہ ہمے بْرانز ءَ مرچیگیں دستونک ءَ چہ در اتکگیں بزانت ءُ معنائی کینوس ءِ سرا ناآشنائیں معنا ءُ بزانت جاگہ کنان اَنت ءُ ہمے بے معنائی وتی جاگہ ءَ روچ پہ روچ شاہگان کنان اَنت۔
چہ وت ءَ پیشءِ درشانداب ءَ جتا بُوہگ ، پرائی ءَ گُشئے ہژدری گندگ بیت۔اے دِگہ گپّے کہ ہمے جتا بُوہگ ءِ رند ءَ کپگ ءَ آ،وتی رنگ ءُ داب ءِ گار کنگ ءِ کُجام کُجام سودا جنگ ءَ ساڑی بُوتگ ءُ لہتے جاگہ ہمے سودا ساسچشتی کار ءِ الّمی بہرے زانگ ءُ گُشگ بُوتگ۔
مرچیگیں شاعری بُنگپی، پگری ءُ لیکہی دْرچ ءَ ہمینچو تل ماں تل گندگ کئیت کہ آئی ءِ زیکّ ءِ پد ندارھگ ءِ شوہازگ جتا یک پِگری جُنزے لُوٹیت۔کشّ ءُ ماں کشّ، اندیمی، ایوکی، وجودی جیڑہ، ہَندی دٗودمانی چہر ءُ چیدگ ، بنیادم ءِ شوہاز ، دٗودمان ءُ دگہ باریں چونیں چونیں مئیل ءُ تب مئے ربیدگ ءِ تہا وتی وتی عہدءِ ندارگ ءِ ساہگ ءِ چیر ءَ گْونڈیں کینوس ءِ سرا شعری درشان ءِ بہرے بُوتگ ءُ روان اَنت۔
بلئے مرچیگیں شاعری ءِ تہا اے کُلّ مئیل ءُ تب گوں وتی ساچشتی بالیدگی ءُ مارِشتانی ہَواری ءَ یک انچیں درشان ءِ کِشکے ءَ سر گِران اَنت کہ مئے پد نُوکی ءِ عہد ءِ ہواریں درسَماءَ سرکشّان بنت ءُ پِگر ءُ مارشت ءِ منزلانی نیمگ ءَ لنکُک شہار دینت۔
دگہ نیمگے مئے سنجیدگیں وانوکانی مارِشتانی تہا شہمے جلکشیت کہ باز اَرزشت دار اِنت ءُ دِلگوش ہم کرزیت کہ نوکیں دستونک ءِ تہا مارِشت ءُ گالوار ءِ تہا یک ہمگْرنچی یے گِندگ بیت ءُ مارِشت ءِ رِد ءَ یک ہَواریں تکے درآہان ءَ گندگ بیت۔ ءُ گپ اِدا کئیت ءُ سر بیت کہ چہ نوکی (جدیدیت) گِستائگی ءِ تک ءَ مارشِت ءِ نیمگ ءَ باروٹی بُوہگ ءِ مارشتے ودی بیت۔بُوت کنت کہ ہمے مارشت ءِ لوٹ ءُ طلب مئے نوکیں نبشتہ کارانی نبشتہ کاری ءِ سرا اثر ءُ سانے دؤربِدنت۔ءُ دگہ یک گُمانے اے اوں ودی بیت کہ لہتے نبشتہ کار یک، یکوڑیں درشاندابے ءِ حِصارے ءِ تہا کپتگ اَنت ءُ چُشیں شاعرانی نام ءَ اگاں گوں دستونک (غزل) ءِ ہمگْرنچی ءَ بہ سندئے تہ لَس وانوک ءِ ہاترءَ اِشانی پجّارگ سکّ گْران بیت۔بلئے اے حیال ءَ لس وانوک ءِ دِل ءِ تہا جْوانیں وڑے ءَ سر نہ کشّ اِتگ۔
منی حیال ءَ اے بابت ءَ لَس وانوک ءُ نبشتہ کار (شاعر) ءِ جند ءَ جیڑگی اِنت۔
اگاں گوں ہُورت نگاہی ءَ چارگ بہ بیت تہ مئے نوکیں عہدءِ شاعری گوں ہچ ہاسیں وڑے ءِ پِگر، جُنز یا لیکہے ءَ گوں ہمگْرنچ نہ اِنت۔آ، چہ وتی کُلّیں لیکہی ءُ جُنزی پاد بندیاں آجو گندگ بیت۔مرچیگیں شاعرءَ چہ وتی بالاد ءَ ربیدگی، چاگردی، لیکہی ءُ پگری چادرءَ کشّ اِتگ ءُ دؤر داتگ۔آ، گوں مرچیگیں عہد ءَ، گوں پگری رُست ءُ ردوم ءَ دیم پہ دیم اِنت ءُ نشتگ ءُ گپّ ءُ تْران ءَ اِنت۔ہمے گپّ ءُ تْران آئی ءَ برے گوں نفسیاتی گِرءُ کشّ ءَ ماں شُولّین اَنت ءُ برے آئی ءَ بے معنائی ءُ جتارنگی ءُ گِستاءِگی ءِ پیچ ءُ تابانی تہا برنت ءُ سر کننت۔ مرچیگیں شاعر وتی اندر ءِ چیر ترّّ اِتگیں واہ ءُ زار ءُ کوکاّراں زُبان دَیگ لُوٹیت.......کہ ہمے واہ ءُ زار ءُ کوکار برے راجدوستی ءِ نام ءِ سرا،برے وت پسندیءِ نام ءِ سرا، برے نیکراہ ءِ نام ءِ سرا ، برے لیکہی ہوار کاری ءِ نام ءِ سرا ءُ برے جندی نپ ءُ سیتّانی نام ءِ سرا چیر ترّینگ بُوتگ اَنت۔۔۔۔۔ ءُ پدا گار ءُ بیگْواہ کنگ بُوتگ اَنت۔نوکیں عہد ءِ شاعری ءِ ندارگ ماں بلوچی شاعری ءِ آزمان ءَ گوں یک نوکیں داب ءُ دْروشمے ءَ ودی بُوہان اِنت۔
مرچیگیں شاعرءِ دیما بازیں جُستے ءَ چو کوہ ءَ سر چِست کُتگ، چہ ہمے جُستانی پیشانی ءَ ، بے تاہیری ءُ تہ پْرشتگی ءِ جاور سَہرا ءُ پدّر اَنت۔چاگردی ، پِگری پرک ءُ درک ءِ چاگرد ءَ یک وت ماں وتی گِر ءُ چیل ءِ کِسّہ یے ودی کُتگءُ ہمے کِسّہ ءِ آتْراپ ءَ آس ءِ بْرانزبُرز تر بُوہان اِنت۔ چہ ہمے بْرانز ءَ مرچیگیں دستونک ءَ چہ در اتکگیں بزانت ءُ معنائی کینوس ءِ سرا ناآشنائیں معنا ءُ بزانت جاگہ کنان اَنت ءُ ہمے بے معنائی وتی جاگہ ءَ روچ پہ روچ شاہگان کنان اَنت۔
چہ وت ءَ پیشءِ درشانداب ءَ جتا بُوہگ ، پرائی ءَ گُشئے ہژدری گندگ بیت۔اے دِگہ گپّے کہ ہمے جتا بُوہگ ءِ رند ءَ کپگ ءَ آ،وتی رنگ ءُ داب ءِ گار کنگ ءِ کُجام کُجام سودا جنگ ءَ ساڑی بُوتگ ءُ لہتے جاگہ ہمے سودا ساسچشتی کار ءِ الّمی بہرے زانگ ءُ گُشگ بُوتگ۔
مرچیگیں شاعری بُنگپی، پگری ءُ لیکہی دْرچ ءَ ہمینچو تل ماں تل گندگ کئیت کہ آئی ءِ زیکّ ءِ پد ندارھگ ءِ شوہازگ جتا یک پِگری جُنزے لُوٹیت۔کشّ ءُ ماں کشّ، اندیمی، ایوکی، وجودی جیڑہ، ہَندی دٗودمانی چہر ءُ چیدگ ، بنیادم ءِ شوہاز ، دٗودمان ءُ دگہ باریں چونیں چونیں مئیل ءُ تب مئے ربیدگ ءِ تہا وتی وتی عہدءِ ندارگ ءِ ساہگ ءِ چیر ءَ گْونڈیں کینوس ءِ سرا شعری درشان ءِ بہرے بُوتگ ءُ روان اَنت۔
بلئے مرچیگیں شاعری ءِ تہا اے کُلّ مئیل ءُ تب گوں وتی ساچشتی بالیدگی ءُ مارِشتانی ہَواری ءَ یک انچیں درشان ءِ کِشکے ءَ سر گِران اَنت کہ مئے پد نُوکی ءِ عہد ءِ ہواریں درسَماءَ سرکشّان بنت ءُ پِگر ءُ مارشت ءِ منزلانی نیمگ ءَ لنکُک شہار دینت۔
دگہ نیمگے مئے سنجیدگیں وانوکانی مارِشتانی تہا شہمے جلکشیت کہ باز اَرزشت دار اِنت ءُ دِلگوش ہم کرزیت کہ نوکیں دستونک ءِ تہا مارِشت ءُ گالوار ءِ تہا یک ہمگْرنچی یے گِندگ بیت ءُ مارِشت ءِ رِد ءَ یک ہَواریں تکے درآہان ءَ گندگ بیت۔ ءُ گپ اِدا کئیت ءُ سر بیت کہ چہ نوکی (جدیدیت) گِستائگی ءِ تک ءَ مارشِت ءِ نیمگ ءَ باروٹی بُوہگ ءِ مارشتے ودی بیت۔بُوت کنت کہ ہمے مارشت ءِ لوٹ ءُ طلب مئے نوکیں نبشتہ کارانی نبشتہ کاری ءِ سرا اثر ءُ سانے دؤربِدنت۔ءُ دگہ یک گُمانے اے اوں ودی بیت کہ لہتے نبشتہ کار یک، یکوڑیں درشاندابے ءِ حِصارے ءِ تہا کپتگ اَنت ءُ چُشیں شاعرانی نام ءَ اگاں گوں دستونک (غزل) ءِ ہمگْرنچی ءَ بہ سندئے تہ لَس وانوک ءِ ہاترءَ اِشانی پجّارگ سکّ گْران بیت۔بلئے اے حیال ءَ لس وانوک ءِ دِل ءِ تہا جْوانیں وڑے ءَ سر نہ کشّ اِتگ۔
منی حیال ءَ اے بابت ءَ لَس وانوک ءُ نبشتہ کار (شاعر) ءِ جند ءَ جیڑگی اِنت۔
چاپ " تاکبند پیاپ" جوسک کیچ تاک اولی
جنوری 2018
٭٭٭
جنوری 2018
٭٭٭
