بلوچستانءِ زیبائی : منیرمومن
بلوچستانءِ زیبائی
منی زیدانی لُڈّوکیں کشارءِ دامنءَ جُنزیت
منی مونجانی معنا اِنت، توارءِ دامنءَ جُنزیت
بلوچستانءِ زیبائی
گُباراں آس کُٹّءَ دنت چراگاں بنگ میچینیت
تھاریں زندمانیءِ دْرئیں آزاراں ریپینیت
بلوچستانءِ زیبائی
بلوچستانءِ زیبائی پہ جوریں دژمناں بیرے
سباءِ نرمکیں دست اِنت ھتم امبازیں تاھیرے
بلوچستانءِ زیبائی
دْرئیں اَھدءِ گماں موکیت یَہ دابے ملگُزارانی
گوں گْواتءَ چئول جنت دائم گُشئے کئیپے بھارانی
بلوچستانءِ زیبائی
بلوچستانءِ زیبائی چُنیں پُر زیمریں سئوتے
اجب رُژنائیں نازینکے اجب مَست ءُ زِریں سئوتے
بلوچستانءِ زیبائی
منی کردار الماس اِنت منی گُپتارءِ ایمان اِنت
منی "انّاں"ءِ ھاٹی اِنت منی اکرارءِ ایمان اِنت
بلوچستانءِ زیبائی
وتی مُرواردیں کاڑانی جیگءِ سْرپتگیں پُلّے
زمینءِ سنگیں دلبندءَ چہ ماہءَ کپتگیں پُلّے
بلوچستانءِ زیبائی
بھشتءَ چہ کئیا زُرت ءُ جھانءِ دامنءَ بستہ
ھمک ارواہءِ پُردوچیں گُشانءِ دامنءَ بستہ
بلوچستانءِ زیبائی
برے درمان بکشائیت برے زیماں بہا زُوریت
کہ رَھنیں توکلّاں موکیت دْرئیں مئیماں بہا زوریت
بلوچستانءِ زیبائی
بلوچستانءِ زیبائی سُبکّیں بیگہءِ گْواتے
بچارے رَبیتے کْوھنیں بمارے نوکیں بنداتے
بلوچستانءِ زیبائی
تئی جلواہءِ باپُشتءَ بدیں اھوال رَد داتنت
گلیں تئی نام گپتہ ءُ شپءِ استال رَد داتنت
بلوچستانءِ زیبائی
منیر مومن
