دستونک - بـرجـان بـلـوچ

گلزمین ءِ ھاتر ءَ گوں لچّھاں رَبّ ءِ در ءَ
ارس بشّامی دْرد ءِ پیم ءَ شَلینتگ یکّے ءَ

ھو مہ کشّات شومّیں دَھر ءِ تَبد ءُ سوچاکیں لِوار
پہ گْومے اُمّیت ءِ دنیا سمبھینتگ یکّے ءَ

مرچیگیں سُھب ءِ سمین ءَ گوں کے ءَ ھیسکار اِتگ
باریں کئی کوھنیں دِگہ ٹَپّے کُدینتگ یکّے ءَ

درد ءِ دْراج کَشّیں شپانی بِلّ تو جُست ءَ مکن
دل گوں بے تاھیریں باھنداں تْرھینتگ یکّے ءَ

سَکّ من ءَ تُرس اِیت وشّ ءُ وژدلی ءِ لِزّتاں
دپ منی گوں شَھد ءُ شیراں کُچّلینتگ یکّے ءَ

ھِیداں جان شود اَت برے زگریں زمستانی شپاں
بے وسی گرماگی نیمروچاں دْرھینتگ یکّے ءَ

گوں وتی شَھزانتی ءَ ماتیں زبان برجان بگوش
سرجمی ءِ سیمسراں آرتگ رسینتگ یکّے ءَ