دستونک - خالق ارمان

دِیدگاں، سَگارانی جَنگلے کہ سَہرا اِنت
سئیل کن شِکارانی جَنگلے کہ سَہرا اِنت

ہون گریتگیں دریا نَکش کَشّ اِتہ ترمپاں
رولہیں نِگارانی ، جَنگلے کہ سَہرا اِنت

شپ چو گوانزگی پاسے بِرانزمالِتہ روچءَ
گُلزمین سَہارانی جَنگلے کہ سَہرا اِنت

تُنّ مَرکیں بِچکندے ساہِگانی باہوٹ اِنت
دُور ، مَلگُزارانی جَنگلے کہ سَہرا اِنت

اے چراگ رَہشونیں گوات ءِ لنکُکُاں بستگ
روک سرمچارانی جَنگلے کہ سَہرا اِنت

انچیں تُرسناکی ے تُنّ ءِ باتِن ءَ شَہمیت
زِرد ریگزارانی جَنگلے کہ سَہرا اِنت

گار ، اَچ وتا ارمان ، پیژگاہ ءِ آتِراپ ءَ
مانِشیں دیارانی جَنگلے کہ سَہرا اِنت