کتابانی سپر۔۔۔۔ جمیل مھراب

 بنی آدم باز براں دراھیں کاماس ءِ چیزاں پراموش کنت ءُ وتی اُمر ءِ سپر ءَ دیم ءَ بران کنت۔ اے سپر ءَ آ اے سما اوں نہ کنت کہ ھمے زند من ءَ رستگ ایشی ءِ تہ ءَ چنچک راز ھست کہ من اگاں ھمے راز ءُ اسراراں دربگیجاں گڑا وت ءَ ،وتی چاگرد ءَ ، ءُ اے جھان ءَ گھتری آورت کناں ۔پد ءَ پدمنتگیں چاگرد ءِ مردماں زند ءِ چار ءُ تپاسگ ءِ موہ نرس ایت آئی ءِ دراھیں زند انچیں جیڑہ ءُ کارانی دیمپانی ءَ گوزیت کہ آ پد ءَ وت ءَ شوھاز ات کت نہ کن انت پرچا کہ بکول ءِ ٹالسٹائی ءِ بے علمیں مردم ءِ زند یک چاگردی کاردارے ءِ پیم ءَ بیت ۔۔۔ اگاں بچار ئِے پد ءَ ھمے کاردار ءِ میار چاگرد ءِ توانائیں مردمانی دست ءَ بیت آ مردم، ھمے مردمانی کار ءُ ازمت ءَ وتی دراھیں زند ءَ ببا دنت ۔ ما کہ انو بس ھمے نان ، لوگ ءُ گد ءِ جیڑہ ءَ گیش نہ ایں گڑا ھمے مئِے گلامی ءِ سانکل گوں مھکمی ءَ گٹ ءَ لوپ انت ھمے گلامی ءُ کارداری ءِ زند ءَ برے مردم ءَ دری راجے دنت ءُ برے وتی پرچا کہ باز براں ھمے راجی پچار چیرتر ایت ءُ زالم ءُ زلم آماچ دیم پہ دیم بنت ۔ گلامی ءُ کارداری ءِ ھلاس کنگ ءَ پیش مردم پیسر ءَ ھمے مارشت بیگی انت کہ من گلامے آں ، من اے دنیا ءَ پہ گلام بیگ ءَ ودی نہ بوتگ آں، ناں بس من ءَ زندمان ءَ آژناگ بیگی انت بلکیں جوانتریں زندے ءِ نیمگ ءَ گام جنئگی انت۔ گڑا آئی ءَ اے مارشت ءَ کتاب ءُ راجکار دی انت۔ بلے کتاب ءِ شری ایش انت کہ مردم وت اوں چاگرد ءِ گھتری ءَ در کیت ، ناں بس وتی تہ ءَ جست ودی کنت بلکیں آ جست کنگ ءَ درکیت ھمے جستاں باوست ءُ گیشّ ءُ گیواری ءَ بھر زوریت۔ وتی زند ءَ پجا کاریت ءُ مردماں جوانتریں زند ءِ پیشداریت۔ من اوں ھمے زند ءِ شوھازگ ءَ کتاباں گوں نزیکی داراں منی جھد ھمیش انت کہ ھمک روچ لھتے ساھت کتاب بواناں داں ھدے ءَ من وانگ ءَ سوبین بوتگاں بلے من گوشاں من ءَ انگت گیشتر وھد وانگ ءَ برس ایت۔ من گیش جھد کناں کہ شریں کتاباں بواناں ھمے کتاباں فکشن ،راجدپتر، فلسفہ گیشتر انت بلے منی ھیال ءَ دراھیں تھرانی کتاب جوان انت۔ بلوچی ءَ مزھب انچیں سرھالے کہ باز نبشتہ کاراں نبشتہ نہ کتگ پرچا کہ مئِے کر ءَ دین پرستی مدام مھکم بوتگ ءُ مئِے نیکراھی مردم دین ءِ شرگداری ءَ اوپار نہ کن انت بلے اے سال ءَ جان مھمد دشتی ءِ سے کتاب ونتگ داں ھدے ءَ اے شریں کتاباں بلے منی ھیال ءَ نیکراھی نبشتہ کارے ءَ اے تک ءَ سک باز پُلکاری درکار انت، بازیں چیزاں بید ءِ پلکاری ءَ اوں واجہ جان مھمد دشتی رد ءُ راست کنت، منی چوناھا یک وھدے ءَ ھمے ھب بوتگ کہ من دراھیں نکراھانی درگت ءَ بواناں بلے پد ءَ رند ءَ اے تب پرشتگ ءُ دگہ نیمگاں دلگوش شتگ۔ 2023 ءَ کہ منی یک کتابے آزمانکانی "ھورکیں زندمان" بس چاپ بوتگ من آزمانک اوں باز ونتگ پد ءَ بازیں تاکبنداں اوں آزمانک ھوار بوتگ انت۔ منی ونتگیں گداراں "باڑ کے اس پار" ، "التوائے مرگ" ، "مسز ڈیلووے" ، "گریوگ پہ تو ایب انت" ، "تارانہ" ، "باپ اور بیٹے" ، "فارن ہائیٹ" ، "ایک گدھے کی سرگزشت" ، "بکھرتی دنیا" ، "نغمہ مرگ" ، "سدہارتہ" ، "گاڈفادر" ،"سورج کا ساتواں گھوڑا" "یادِ مفارقت" "بنجر میدان"، "پھانسی" ءُ "ہوئے تم دوست جس کے" اے درست جوانیں گدار انت بلے فکشن ءِ ھمراھی ءَ من ءَ لھتے نان فکشن کتاب اوں سک دوست بوتگ انت ”مری بغاوت“ کہ مارا ھما وھدے سرپدی ءَ دنت کہ انگریزاں مئِے ملک کبزہ کتگ بلے بلوچاں وتی بھادری ءَ اے جنگ ءَ انگریز پروش داتگ انت چہ اے دابیں چیزاں ما وتی راجدپتر ءَ آژنانگ بیں ءُ ھما راج کہ کبزگیر بوتگ انت آیاں مارا ایرجتگ گڑا ما وتی گوست ءِ سر ءَ پھر بندیں۔ نان فکشن آ دگر کتاباں ”انسانی تہزیب کا ارتقاء“ سکیں شریں کتابے بلے رجانکار ءَ سرجم ءَ رجانک نہ کتگ۔ ”بلوچی قصہ“ اوں شریں نبشتانک انت بلوچی اکیڈمی ءَ رد ءُ بند داتگ انت۔ ”مسائل فلسفہ“ رسل ءِ گچینیں کتاباں ھوار انت بلے من ءَ آئی ءِ ”تعلیم اور سماجی نظام” گیشتر دوستر بوت ، ”ثقافت اور سامراج“ ءِ شری ایش انت ایڈورڈ سعید نوآبادیاتی رداں چیزاں چاریت ما وت کہ نوآبادیاتی اھد ءِ مردم ایں گڑا مارا اوں چہ آئی ءِ وانگ ءَ باز سرپدی رس ایت۔ ”جدید ناول کا فن“ ءُ ”نوجوان ناول نگار کے نام خط“ چہ اے کتابان مارا گدار ءِ درگت ءَ باز سرپدی رس ایت۔ نھرو ءِ نمدی کہ شاکر شعور ءَ رد ءُ بند داتگ اوں سکیں بے دروریں کتابے بایدیں ایشی ءِ دراھیں نمدی ما دیری رجانک بہ کتیناں ءُ لینن کہ دنیا ءِ نامداریں رھشون ءُ نبشتہ کارے بوتگ وانوک ءَ ھچبر بے بھر نہ کنت ءُ ”قومی مسئلے کا تنقیدی جائزی ، قوموں کا حق خودارادیت“ آئی ءِ گچینیں کتابے من ءَ باز دوست بوتگ۔ اے سال منی نز ءَ من گیش شریں کتاباں ونتگ انت ھمے تاکبند ءُ رد ءُ بند داتگیں کتاب اوں شر بوتگ انت ءُ جھد کناں کہ نوکیں سال ءَ گیشتر بواناں پرچا مردم ھمینچک گیش وانیت وت ءَ گیش آسودگ ءُ گھتر کنت چاگرد ءَ وتی شرتر کنت ءُ اے دنیا ءَ جوانتر کنت۔