بلوچی ساز ءُ زیمر ءِ پِڑ ءَ اُستاد عبدالستّار بلوچ ءِ پُشپد اُستاد شوکت مُراد ــ اسحاق خاموش

بلوچی ساز ءُ زیمر ءَ تاں اے جاہ ءُ مقام ءَ سربُوہگ ، اُستادانی جکانسریانی برورد اِنت کہ مرچی دُنیا ءِ ھمُک ھند ءُ دَمگ ءَ بلوچی ساز ءُ زیمر ءَ پہ وت ءَ یک جتائیں پجّارے ودی کُتگ۔کلاسیکل گُشندہانی تہا سالمی، رَمی، اشرف دُرّا، مُلّا موسٰی،قادر بخش ، کمالان، مزارابراہیم، بشّام ءُ نوکیں ساز ءُ زیمر ءِ تہا اُستاد عبدالستّار، شفیع بلوچ، شیرمحمد، امام بخش مستانہ، امام بخش مجنوں، غلام رسول دینارزئی ءُ قاسم امین ءِ مزنیں جُہد ءُ جفایے ھَوار اَنت۔

اُستاد عبدالسّتار بلوچ ، بلوچی نوکیں عہد ءِ ساز ءُ زیمر ءِ پڑ ءَ ھما بامرد اِنت کہ آئی ءَکراچی ءِ جُلگہیں شہر ءَ نِشت ءُ رانگیواڑہ لیاری ءِ یک کسانیں کُوٹی ءِ تہا زُبان ءُ زیمر ءِ ھما ھزمت کُت کہ تنیگہ ھچ ادارہ ءَ کُت نہ کُتگ۔اُستاد عبدالستار بلوچ یک بے تماہ  ءُ دِل سپائیں اِنسانے اَت۔آئی ءَ بلوچی ساز ءُ زیمر ءِ پِڑ ءَ بے حساب لائک ءُ زانتکاریں شاگرد ودی کُت۔1960 ءِ زمانگ ءَ بگر تاں 1980 ءَ آئی ءِ شاگردانی تہا آئی ءِ بْرات رشید بلوچ، شیر محمد بلوچ، غلام رسول دینارزئی، امام بخش مجنوںقاسم امین ءُ نوکیں زمانگ ءِنام کشّ اتگیں گُشندھانی تہا  عارف بلوچ، مُسلم حمّل ، شاہ جان داؤدی، نبیل بلوچ ، سُہیل بلوچ ،خورشید بلوچ، خلیل رونق، حفیظ بلوچ، طُفیل سنجرانی (سندھی نامداریں گُشندھے )،دلشاد حیدر ، ملنگ شاہ شہرکی ، حمید شریف، رسول بخش احمدی، بالاچ ساجدی، الطاف ساجد، صابر بلوچ، طاہر پیشکانی، اسماعیل آفتاب، شہزاد ساجدی، شیراز ساجدی، حمید سربازی ءُ ناصرخان ءِ ھواریءَ اُستادءِ دگہ یک انچیں شاگردے کہ آئی ءَ27 سال ءَ اُستاد عبدالستار بلوچ ءِ شاگردی کُتگ۔اُستاد شوکت مُراد۔

اُستاد شوکت مُراد ءَ وتی زِند ءِ مزنیں بہرے گوں اُستاد عبدالستار بلوچ ءَ گْوازینتگ  ءُ اُستاد ءَ آ، انچو دوست بُوتگ کہ گُڈّی ءَ وتی کلب ئےِ اُستاد شوکت مُراد ءِ دست ءَ داتگ پدا آئی ءَ اُستاد شاگرد درس داتگ انت۔

اُستاد شوکت مُراد 1967 ءَ ماں روکپتی بلوچستان ایرفشان ئَ ودی بُوتگ۔ وھدے آئی ءِ عُمر یک سالے ات آئی ءِ کہول لڈّ اِت ،اتک ماں کراچی ءِ دَمگ رانگیواڑہ ءَ جہہ منند بُوت۔تاں شش جماعت ءَوتی میتگ ءَ ونت ئےِ بلئے وھدے آئی ءِ کہول لڈّ اِت ءُ بھٹو کالونی ءَ شُت، آئی ءِ وانگ ءِ دْرچ سِست ، بلئے پدا زُوت آئی ءَ یک نائٹ اسکولے ءَ تاں دہ کلاس ءَ ونت ، زِند ءِ جنجال ءُ نیزگاری ءَ اُستاد شوکت مُراد دیمتر ءَ وانگ ءَ نئشت۔ آئی ءَ چہ کسانی ءَ گوں بلوچی ساز ءُ زیمر ءَ مزنیں ھُبّ ءُ واھگے است  ءُ پدا ھما وھد ءَ ماں کراچی ءِ کُنڈ کُٗنڈ ءَ اُستاد عبدالستار بلوچ ءُ اُستاد شفیع ءِ نام ءُ توار جکس اتگ ات۔

1983 ءِیک بیگاھے ءَ ” بھّیا باگ“ (مولوی عثمان پارک )ءِ نزّیک ءَ ماں اُستادجمّعہ ءِ بینجوءِ دُکّان ءَ اُستاد عبدالرحمٰن بلوچ ءَ شوکت مُراد گوں اُستاد عبدالستار بلوچ ءَ دُچار پِرّینت ءُ گوں اُستاد ءَدزبندی یے کُت کہ شوکت مُراد ءِ توار وشّ اِنت ءُ بلوچی سؤت ءِ گُشگ ءَ ھُبدار اِنت۔اُستاد ءَ آئی ءِ توار گوشداشت دوست ئِے بُوت۔پنچ کلدار ءِ چنا ئِے لوٹائینت، شاگردی ءِ بندیک  ئےِ  شوکت مُراد ءِ دست ءَ بست۔

چہ ھما روچ ءَ اُستاد شوکت مُراد گوں بلوچی زُبان ءُ اِزم ءِ ھزمت ءَ ھمگْرنچ اِنت ءُ اُستاد عبدالستار بلوچ ءِ کار ءَ دیما بران اِنت۔ آئی ءِ جْوانیں شاگردانی تہا لطیف مندی، جام ابراہیم، نعیم یوسف ، حمید بلوچ ، اصغر مُراد، زبیر ذاکر، رحیم ساجد، نسرم بابُو، عامر بشیر، شہنواز اسحاق، بلال باقی، رحیم بلوچ، دینار جُمعّہ ساجد قادر، جاسم ءُ منصور غُلام ءِ نام ھَوار اَنت۔لہتے ءِ نوار ماں نہادی ءَ اتکگ ءُ باز نامدار بُوتگ اَنت ءُ لہتے انگت دربرگ اَنت۔

چہ 2010 ءَ اُستاد شوکت مُراد ماں کیچ ءَبلوچی ساز ءُ زیمرءِ دیمرئی ءَ جُہد ءُ کوشست ئےِ کنگ ءَ اِنت۔آئی ءَ ” اُستاد عبدالستار بلوچی زیمر کلب ئےِ پچ کُتگ ءُ شاگرداں ھیلکاری دنت ءُ آئی ءَ اے کلب گوں وتی جُہد ءُ کوشستاں چہ بلوچستان ءِ سرکار ءَ رجسٹرڈ اوں کنائینتگ بلئے انگت ءَ آئی ءَ ھچ کُمک ءُ مدتے نہ رستگ۔ماں تعلیمی چوک کیچ ءَ بلوچستان اکیڈمی ءَ وتی جاگہ شوکت مُراد ءَ پہ کلب ءِ ھاتر ءَ داتگ ءُ آ، گوں وتی جند ءِ کُمک ءَ ھمے ھیلکاری کار ءَ دیما بران اِنت۔  ھشت ءُ ھپت شاگرد اُستاد ءِ کلب ءَ دربرگ ءَ اِنت چہ آھانی ماھینی فیساں آئی ءَ ھشت ءُ دہ ہزار کلدار ماھے رسیت۔ءُ اَنچو آ، وتی گُزران ءَ کنت۔آئی  ءِ کہول  لیاری کراچی ءَ باڑہ ءِ لوگے ءَ نشتگ ءُ وتی زھگاں وانینگ ءَ اِنت۔ نیزگاری ءُ نادزرسی ءَ بلوچ اِزمکارانی دَر دیستگ۔ تاں ھشت سال ءَ اُستاد شوکت مُراد ءِ لوگی گُٹّگانی نادْراہی  ءِ آماچ بُوتگ۔گُڈسر ءَ یک گُٹّگے ءَ وتی کار یلہ داتگ ءُ پہ لاچاری یک گُٹّگے کشّگ بُوتگ۔گْون ئےِ اسپتالی تچ ءُ تانکاں آئی ءَ مزنیں زرّیے ڈاکٹر ءُ طبیباں داتگ۔

من چہ 1993 ءَ اُستاد شوکت مُراد ءَ چہ نزّیک ءَ زاناں، آ، وتی اِزم ءِ پِڑءَ سکّ جُہد ءُ جفا کنت۔دلپْروش ءُ دم بروکیں مردُمے نہ اِنت۔گوں ساز ءُ زیمر ءَ دل پہک اِنت ءُ پدا ساز ءُ زیمر ءِ باروا آئی ءِ علم ءُ زانشت اوں سکّ باز اِنت۔

بائد اِنت کہ مُلکی ادارہ ءُ اکیڈمی ءُ درُملک ءَ (بحرین، مشکت، گتر، امارات) نشتگیں بلوچ ءُ بلوچی ادارہ اُستاد شوکت مُراد ءَ دست بگر اَنت، آئی ءَ بُلوٹائین اَنت ءُ آئی ءِ شرف ءَ مراگش ءُ پروگرام بہ ٹہین اَنت۔اُستاد شوکت مُراد ءِ وڑیں راجی مڈّیانی دست گرگ ،آھانی دلبڈّی ءُ مدت ءُ کُمک کنگ مئے راجی ڈُبّہ ءُ زِمہ واری اِنت۔

 گوں شوکت مُرادءَ رہوَت کنگ ءِ ھاتر ءَ