Family Planning نبشتہ کار: ازرائیل یوزُلَر - رجانکار: رُژنا بلوچ - پنچمی بھر

"اے ھمے پیم اِنت کہ تو وتی دماگ جوڈ کُتگ کہ مرد ءَ راستی ءَ گُش ئے کہ تو چوں لاپُرّ بیتگ ئے؟" من ترا جُست آں کہ ترا ھرچ ماہ من ءَ دو ملین دیگی اِنت، انچوش کہ تو مَنّ اِتگ اَت۔ اے ماہ ءِ تو روان نداتگ اَنت۔ من ترا 48 کلاک ءِ وھد دیاں، اگاں تو زَرّ روان ندات اَنت من تئی مرد ءَ کال کناں ءُ تئی درائیں دروگاں پَدّر کناں۔" ڈاکٹر ءَ گُشت۔ ایملیہ ءَ دو ماہ زَر داتگ ھما اِنت کہ اے جیڑہ بندات بیتگ، بلے آ یکُوئی زَرّ لُوٹگ ءَ اَت۔
"ڈاکٹر منی سرا بزّگ بہ کن، منی کِرّ ءَ نی زَرّ نیست۔ ھرچی کہ منی کِرّ ءَ بیتگ من ترا داتگ اَنت۔ من نزاناں نی چہ کجا چے ترا N2 ملین بیاراں بدیاں۔ مھربانی بہ کن منی رازاں پَدّر مہ کن۔ من سوگِند وراں کہ وھدے من ءَ زَرّ بیت، من ترا دیاں۔ انّی منی اکاؤنٹ ھالیگ اِنت۔" ایملیہ ءَ گُشت۔ آ دو روچ بیت کہ یکّوئی گریوگ ءَ اِنت، لاپُرّی ءِ وجہ ءَ آئی ءَ بازیں درد ءُ دْور پِر۔ ھرچ ماہ ڈاکٹر ءِ زوراکی نی اُوپار ءَ چہ گوستگ۔ آئی ءِ چُک مات بؤگ ءَ ھم نی چیزے وھد پَشت کَپتگ۔ ڈاکٹر ءَ آئی ءِ چُک ماتی ءِ پروسیجر ھم آئی ءَ سرپد کُتگ۔ آئی ءَ وتی درائیں زَرّ پہ چُکّ ءِ لیبُوک ءُ سامان گِرھگ ءَ ھرچ کُتگ اَنت کہ مرد ءَ داتگ اَنت۔ اے وھد پہ آئی ءَ وشّیں وھدے بیتیں بلے اِنّی آ اے ھم نزانت کہ چے بہ کَنت۔ جیری ھم یَکّوئی کال کنگ ءَ اِنت ءُ یات دیگ ءَ اِنت کہ چُک آئی ئیگ اِنت۔
"من ترا چے اے ھبر ءَ اِش کنگ نہ لُوٹاں، تئی چُک مات بؤگ ءِ روچ ھم نَزّیک اِنت ءُ من زاناں کہ تو چُک مات ھم مئے نادرہ جاہ ءَ بئے۔ من تئی واستہ تھنا اے کُت کناں کہ ترا کمّو وھد دات کناں۔ تئی چُک ماتی ءِ روچ ءَ تئی کِرّ ءَ N2ملین بہ بیت۔ تو اگاں اے کُت نہ کُت گڑا من ھمودا تئی مرد ءَ درستیں ھالاں دیاں۔ شَپ وش بات۔" ڈاکٹر ءَ ایملیہ گُشت ءُ کال بند کُت۔
ایملیہ سَک گریوگ ءَ اَت، آ نزانگ ءَ اَت کہ نی چے بہ کناں۔ آئی ءَ پیسرا چے وتی مرد ءِ کِرّ ءَ باز زَرّ زُرتگ، ءُ آ زانت کہ نی آ دگہ زَرّ نہ دَنت کہ آ ڈاکٹر ءَ دات بہ کَنت۔ اے گَپ ءِ تہا ھچ ردی نیست کہ آئی ءِ مرد ءِ کِرّ ءَ باز زَرّ ھست بلے گوستگیں سئے ماہ ءِ تہا آئی ءَ مرد ءَ باز زَرّ داتگ۔ یک روچے وَ آئی ءَ جُست ھم کُت کہ اینچو زَرّ ءَ تو چے کنگ ءَ ئے۔۔۔ آئی ءَ مرد ءِ کِرّ ءَ دروگ بَست ءُ ھبر اِیدا ھود کُت۔ 
"انچو سما بیت کہ منی درائیں دروگ منی پُشت ءَ کَپتگ اَنت۔ من ءَ نی اے ھم بیسہ نہ کَنت کہ زَرّ زیرگ ءَ پَد ڈاکٹر منی رازاں وتی دل ءَ داریت اگاں ناں۔ من نزاناں کہ چے بہ کناں۔ من اے جیڑہ ءَ چہ چون دَر بیا آں؟" ایملیہ ءَ وتا جُست ءَ اَت ءُ سَک گریوگ ءَ اَت۔
آ گریوگ ءَ گوں واب کَپت۔ جسٹس شُتگ بازار ءَ راشن گِرھگ ءَ، وھدے آ واتَرّ اِت ءُ کمرہ ءِ تَھتَگے پَچ کُت۔ گڑا آئی ءَ دیست کہ جنین ءِ گُبّانی سرا ارسانی ٹَپ اَنت ءُ آ واب اِنت۔ آ سَک پریشان بیت کہ جنین ءَ چیا گریتگ۔ ایملیہ واب ءَ چہ پاد اَتک وھدے آئی ءَ مرد ءِ برمْش اِش کُت۔
"منی جان، تو چیا گریتگ؟" جسٹس ءَ ایملیہ جُست کُت، ایملیہ پاد اَتک ءُ مردے بَگَل ءَ کُت۔
"من ءَ ھچ نہ اِنت جان۔ چُکّ ءَ لاپ ءِ تہ چے لَگَتے جَت، سَک درد بیئگ ءَ اَت۔ من تئی ودار ءَ بوتگ آں کہ تو کائے، بیا بہ نِند۔ نُنُّک سَک یات کنگ ءَ اِنت ترا، پمیشکہ من ءَ لَگَتے جَت کہ تو شُتگ ئے لُوگ ءَ چے۔" ایملیہ ءَ دروگ بَست۔ آئی ءَ زُوت وتی اَرس ھم ساپ کُت اَنت ءُ وتی مرد ءِ دَستے داشت۔
ھمے شَپ ءَ ایملیہ ءَ وتی مرد ٹَگّینت ءُ دِگہ زَرّے لُوٹ اِت۔ آئی ءَ مرد ءَ گُشت کہ زَرّ بدے کہ چُک ماتی ءِ وھد ءَ زلُورت بیت۔ ایملیہ ءِ بَھت زور بیتگ کہ آئی ءِ مرد ءَ دَری مُلک ءَ چہ کال اَتکگ آئی ءِ ھمکار ءِ کہ بیا، ءُ آ چُکّ ءِ پیداک بوؤگ ءِ وھد ءَ اِیدا نہ بیت۔
"تو زان ئے، تو زُوت ڈَنّ ءِ مُلک ءَ روگ ءَ ئے ءُ آ روچ ءَ اِیدا نہ بئے کہ چُک پیداک بیت۔ گڑا شَرتریں کہ زَرّاں منی اکاؤنٹ ءَ مان بہ کن کہ نادرہ جاہ ءِ ھرچہ ءِ زَرّاں من دات بہ کناں۔" ایملیہ ءَ گُشت۔ جسٹس ءَ ھم آئی ءِ ھبر زُرت ءُ 3 ملین آئی ءِ اکاؤنٹ ءَ مان کُت۔ ایملیہ سَک گَل بیت۔ ءُ آئی ءَ جیڑ اِت کہ نی اے جیڑہ ءِ گیشّ ءُ گیّوار کنگ ءِ واستہ چیزے کنگی اِنت۔
"اے سئیں مردم منی گُٹّ ءَ لُوپ اَنت ءُ ھرچ دو روچ پَد نُوکیں جیڑہے بِناہ کنگ ءَ اَنت۔ من نی اِشاں پیشداراں۔ جیری ءُ منی آستُونک ءِ مار بزانکہ منی دزگوار ایڈنہ ءُ ڈاکٹر نی ساڈی بہ بَنت کہ آیانی گوما چے بیت کَنت۔ من آیاں پیشداراں کہ منی گوما آیاں داوہ زُرتگ، سَک رَد کُتگ۔ من اِشاں انچوش کناں کہ یات بہ کناں۔ دانکہ زندگ اَنت وتی دَپ ءَ بند کن اَنت۔ من ھما وھد ءَ داں اشانی دَپ ءَ بند کنائیناں، دانکہ آ وت بہ زاناں کہ اے راز پاشک کنگی نہ اَنت۔ آ بائدیں اے چیز ءَ بہ زان اَنت۔ ایملیہ گوں وت ھبر ءَ اَت، وھدے آئی ءِ اکاؤنٹ ءَ سئے ملین اتک۔
دومی روچ ءَ، آئی ءَ جِیک ءَ یک کارے دات، جِیک ایملیہ ءِ شَرّیں سنگتے، وھدے آ لوگوز ءِ نیمگ ءَ نِشتہ بیتگ آئی ءَ گوں دُچار کَپتگ۔ جِیک یک گینگسٹرے ءُ لوگوز ءِ تہا مردم آئی ءِ کِرّ ءَ سَک تُرس اَنت، آئی ءِ یک مزنیں گینگے۔
"منی کِرّ ءَ یک کارے است تئی واستہ، لھتے مردم است من لُوٹاں تو آیا چِیست بہ کن ئے ءُ وتی کِرّ ءَ بدار ئے، دانکہ من ترا مہ گُشاں آیانی یلا دیگ ءَ۔ وتی اکاؤنٹ نمبر ءَ روان دے۔" ایملیہ ءَ جِیک گُشت۔اے باز تُرسناکیں گُنڈائے وتی میتگ ءِ۔
"تو ھمے بہ سمج تئی کار بیتگ۔" جِیک ءَ گُشت، ھمے دمان ءَ آئی ءَ یک ملین ءِ میسیجے ھم رَست، ایملیہ ءِ نیمگ ءَ چہ۔ دومی روچ ءَ ڈاکٹر، ایڈنہ ءُ جیری بیگواہ کنگ بوت اَنت۔
"من تئی منتواراں کہ تو اے کار کُت۔ مھربانی بہ کن، اشاں ھما وھد ءَ بہ دار دانکہ من چُک مات نباں۔ منی مرد ءَ گُشتگ آ من ءَ ءُ منی چُکّ ءَ ڈَنّ ءِ مُلک ءَ بارت۔ وھدے من ڈَنّ ءِ مُلک ءَ رواں گڑا تو اِشاں یلا بہ دے۔" ایملیہ ءَ جِیک سَک دلجَمیں توارے ءَ گوں گُشت۔