نوکیں سال - اِسحاق خاموشؔ

روچاں بانزُل پِر اَت بال بُوت ءُ شُتنت
ماہ ءُ سال گْوات ءِ رپتار ءَ ہمگام اِتنت
مُدّ ءُ موسم وتی وہد ءَ اتک ءُ شُتنت
سُہب ءُ بیگاہ چو گھڑیالے ءَ دْرتکگ اَنت
وہد ءِ دِیوال ءِ دیما
دِل ءِ دْریکگانی حساب ءَ جننت
زِیکّ ءُ باندات ءِ دئیناں شُتنت قؤل ءُ وعدہ
دِل ءَ جُست بکن
آسر ءِ کِسّہ ءِ لبز لبز ءَ بِچار
دْرچکے ءِ تاک ءُ بُرّانی پیم ءَ کُتنت گْوات ءَ روپان
ءُ پلّے ءِ چَکّ ءَ جتنت
اَنچو اَنچو اے چاگرد ءِ تب مَٹّ بُوت
ماہ ءُ تو انگت ءَ ساہگے نِشتگیں
چُرتے ءَ کپتگیں
نوکیں سال ءِ در ءَ
چینچو مردُم گْوزیت، چینچو کِسّہ بُجیت
چینچو آگاہی ءِ واب معنا نہ بنت
من تو سُدّھ ءَ نہ ایں
سال پِر گْوستگ اَنت ،
وہد اوں لیٹ اِتگ
نوکیں سال ءِ دَر ءَ ما قدم ایرکُتگ
نوکیں سال ءِ سباہ، گَرم،بیگاہ ءُ شپ
دُْرست مَٹّ بُوتگ اَنت
نوکیں سال ءِ تہا من تو باریں کُجام کِسّہ ءِ بَہر بئیں
نوکیں سال پیسری سال ءِ پیم ءَ نہ اِنت
جیڑگی اِنت من ءَ ، جیڑگی اِنت ترا!!