Family Planing نبشتہ کار: ازرائیل یوزُلَر رجانک: رُژناہ بلوچ - اولی بھر

اولی بہر

من لاپُرّاں، اے یک بلائیں جیڑہے منی واستہ۔۔۔ من نہ لوٹ اِتگ کہ چوش بہ بیت۔ اے وڑ بیت چون؟ منی مرد ءَ پمیشکا نسل بندی کتگ اَت کہ آئی ءَ نہ لُوٹ اِتگ اَت من انوں لاپُرّ بہ باں۔ من انوں 100 لیول ءَ آں ءُ من لاپُرّی ءَ ساری وتی شاھدربرجاہ ءِ وانگ ھلاس کنگ لوٹ اِتگ، دانکہ من وتی چُکّ ءِ ھیال ءَ داشت بہ کناں۔ نوں من چے پیم وتی مرد ءَ سرپد بہ کناں؟ من چوں وتی مرد ءَ بہ گُشاں کہ من لاپُرّاں ءُ اے چُک آئی ءِ نہ اِنت۔۔۔!

ایملیہ وتی ہاسٹل ءِ کمرہ ءَ نِشتگ ءُ جیڑگ ءَ اِنت۔ ءُ وڑ وڑیں ھیال آئی ءِ دماگ ءَ آیگ ءَ اِنت۔ آئی ءَ اے چیز ءِ باز درد بیت کہ آئی ءِ ماہ واری 5 روچ Late اَنت۔

آ بیگاہ ءَ شُتگ اَت درمان جاہ ءَ لاپُرّی اسٹرپ ءِ گِرھگ ءَ کہ آئی ءِ وانگ جاہ ءِ نزیک ءَ اِنت۔ وھدے آ وتی کمرہ ءَ اَتک ءُ پیشاپ ءِ ترمپے اسٹرپ ءِ سر ءَ ریتک، گڑا آ سَک ھَبَکہ بوت۔ چیا کہ اسٹرپ پوزیٹو لین ءَ چہ گوستگ اَت۔ آئی ءِ دل ءِ دریکّگ سَک تیز بیت اَنت، چیا کہ آ زانت نوں مرد ءَ سرپد کنگ سَک گران اِنت کہ آ چوں لاپُرّ بیتگ، وھدے کہ سیر ءَ پَد آیاں نسل بندی ءِ پیسلہ زُرتگ۔ نسل بندی ءِ سبب ءَ آئی ءِ مرد اے لائک نہ اِنت کہ جنین ءَ لاپُرّ کُت بہ کَنت۔ نسل بندی ءَ ساری آئی ءِ مرد ءَ وتی"Child Making Liquid" چُک پیداک بَیوکیں آپ یک جاہ کُتگ اَنت ءُ جمینتگ اَنت۔ آئی ءَ ھمے پیسلہ زرتگ کہ وھدے جنین ءِ وانگ سرجم بیت گڑا اے "Liquid" آپ ءَ لاپُرّی ءِ واستہ کارمرز کناں۔

"من نوں چے بہ کناں؟ من اے ھال ءَ چوں وتی مرد ءَ بہ دیاں؟ من نزاناں چے پیم آ منی ھبر ءَ سرپد بیت، چیا کہ ما نسل بندی ءِ تہ ءَ اِیں۔ آ وَ منا لاپُرّ کُت ھم نہ کَنت۔ من چوں گَل بیتگاں کہ منی سیر انچیں مردمے ءَ گوں بیئگ ءَ اِنت کہ نسل بندی ءَ رازیگ اِنت ءُ من ءَ وانگ ءِ ھم رَزاہے داتگ لاپُرّی ءَ پیسر۔ بلے منا بچار من 100 لیول ءَ لاپُرّ بیت آں۔ من ءَ انچوش سماہ بیت من وتی واستہ سک لاپروہے آں۔" ایملیہ گوں وت ھبر ءَ اَت۔ لاپُرّی ءِ اسٹرپ انگت آئی ءِ دست ءَ اَت ءُ آ دم پہ ساھت آئی ءَ چارگ ءَ اَت۔ آ سَک پریشان اَت، آئی ءَ پیسلہ کُت کہ وتی دزگھار ءَ گوں اے ھبر ءَ کناں۔ آ وتی کمرہ ءَ چہ دَر اَتک ءُ ایڈنہ (دزگھار) ءِ کمرہ ءَ شُت۔

"من لاپُرّاں ایڈنہ…! ءُ اے وشّیں ھالے نہ اِنت منی واستہ… من سَک پریشان آں ءُ تُرسگ ءَ آں"۔ ایملیہ انچوش ایڈنہ ءِ کمرہ ءَ پُتریت اے ھبر ءَ کَنت۔

"تو پریشان ئے چیا اگاں تو لاپُرّ ئے؟ تو وَ سیر کتگ، ترا مردے است ءُ منی ھیال ءَ تئی مرد سَک گَل بیت وھدے آ سرپد بیت کہ تو لاپُرّ ئے۔ تو وتی لاپُرّی ءَ پریشان ءِ چیا"؟ ایڈنہ ءَ ایملیہ جُست کُت کہ آئی ءِ کمرہے کُنڈے ءَ نِشتگ اَت۔

"منی مھروان، تو سرپد نہ بئے، بائدیں اے وشّیں ھالے بیتیں پہ من بلے نہ اِنت۔ اے پہ من بدیں ھالے چیا کہ منی مرد رازیگ بیتگ دانکہ منی وانگ ھلاس نہ بیت، من لاپُرّ نہ باں۔آ اے چیز ءَ رازیگ بیتگ کہ منی وانگ کُٹّیت گڑا ما چُکّے کاریں۔ ھمے واستہ ما درمان جاہ ءَ شُتگیں ءُ نسل بندی کُتگ۔ من بائدیں لاپُرّ مہ باں چیا کہ منی مرد ءَ وتی نسل بندی کُتگ۔ آ اے کابِل ھم نہ اِنت کہ جنینے لاپُرّ بہ کَنت۔ آ ھر یکشمبے ءَ کئیت منی کمرہ ءَ بلے منا لاپُرّ کُت نہ کَنت، نسل بندی ءِ سبب ءَ۔ اے چیز تَچک ءَ دَرا اِنت کہ من گوں وتی مرد ءَ دَگا کُتگ۔" ایملیہ ءِ چم ارس اِتاں ءُ ایڈنہ آئی ءِ ارساں پَھک کنگ ءَ اَت۔

"بچار من اگاں شرّی ءَ سرپد بوھگ ءَ آں گڑا تو گشئگ لوٹگ ءَ ئے کہ تئی لاپُرّی ءِ سبب تئی مرد نہ اِنت…ھمے گُشئگ لوٹگ ءَ ئے تو؟" ایڈنہ ھیرانی ءَ گوں ایملیہ ءَ جُست ءَ اَت۔

"ھئو! منا باور اِنت کہ اے چُک منی مرد ءِ نہ اِنت۔من ترا گُشت ناں کہ آئی ءَ نسل بندی کُتگ۔ من سَک ھراب پَس اِتگاں ءُ تُرسگ ءَ اِنت ھم"۔ ایملیہ ءَ گُشت۔ آ گریوگ ءَ اَت ءُ ایڈنہ آئی ءَ دلبڈّی دیگ ءَ اَت۔

" گڑا اے چُک کئیگ اِنت؟ اگاں تئی مرد ءِ نہ اِنت گڑا کئے ءَ ترا لاپُرّ کُتگ"؟ ایڈنہ شَکّ ءِ ھساب ءَ جُست ءَ اَت، ءُ ایملیہ ءِ نزیک ءَ اَتک کہ آئی ءِ توار ءَ شَر اش کنگ ءَ نہ اَت۔

"منی ھیال ءَ جیری ئیگ اِنت" ایملیہ ءَ گُشت۔"

"جیری کئے اِنت؟" ایڈنہ ءَ جُست کُت۔

"جیری منی سنگتے مکتب ءِ، ما 2 ماہ بیت ھور اِنت۔" ایملیہ ءَ گُشت ءُ آئی ءِ چم یَکوئی اَرس اَنت۔

"تو سیر کُتگ انگت ترا سنگت است؟ تو وتی مرد ءَ گوں اے پیم چوں کُت کن ئے یار؟ من نوں ھچ نزانگ ءَ کہ ترا چے سوج بہ دیاں… من بس ھمے گُشت کناں کہ نوں تو وتا شَر بہ کن گڑا ما چیزے جیڑ اِت کنیں۔" ایڈنہ ءَ گُشت۔

"اناں! من شَر بیت نہ کناں ایڈنہ، من رواں لوگ ءَ مرد ءَ ھال دیاں… منی ھیال ءَ آ بائدیں سرپد بہ بیت… من وتی سیر ءُ سیادی ءَ دروگ ءِ بن ءَ ایر کُت نہ کناں۔ منی سیر ءَ یک سالے بیتگ ءُ من نہ لوٹاں کہ دِگہ دروگے مئے نیام ءَ بہ بیت۔ من رواں اے چیز ءَ مرد ءَ تَچک ءَ گُشاں… من زاناں منی مرد منا بکشیت کَنت۔ من سرجم نہ آں۔ من مردمے آں۔" ایملیہ ءَ اے ھبر کُت اَنت ءُ کمرہ ءَ چہ دَرآیگ ءَ اَت۔ ایڈنہ ءَ پُشت ءَ چہ دارگ ءِ جُھد کُت کہ مرو، مرد ءَ ھال مدے۔

ایملیہ زوت چہ ہاسٹل ءَ دَراَتک۔ آئی ءَ جیڑاِتگ اَت کہ مرد ءَ درائیں راستی ءَ گُشاں ءُ پَھِلّی لوٹاں۔

"من اے چُکّ ءَ دور ندیاں… ءُ ناں کہ من من وتی سنگت جیری ءَ دیانے۔ آ سَک لاپرواہے، من تھنا وشّی زورگ ءَ بوتگاں آئی ءِ گوں۔ من چے زانتگ کہ آ من ءَ لاپُرّ کَنت۔ منی مرد شرّیں مردمے، آ من ءَ پَھِل کَنت۔" ایملیہ گوں وتا ھبر ءَ اَت ءُ روگ ءَ اَت ٹاؤن ءَ کہ ھودا آئی ءِ مرد ءِ لوگ اَت۔

دومی بھر ءِ ودار ءَ بہ کن اِت۔

Family Planing 

نبشتہ کار: ازرائیل یوزُلَر 

رجانک: رُژناہ بلوچ