تو مھناز نہ بئے - یونس حسین

من بے سما تیاب ءِ دپ ءَ نشتگ اتاں باریں شپءِ چی وھد اَت-گپ ھم انچینے اَت کہ من آئے روچ انت بے وتاں-نا شری ءِ سرا ورگ وراں نا منا اے سُد ھست کہ منی سیٹھ من ءَ شوھازگ ءَ انت-ایوک ھمے پگر ءَ آں کہ کراچی ءِ دیم داتگیں ماھیگ پرچا ھراب بوتنت-زاناں ماھیگانی ھرابے ءِ ذمہ وار ایوک مناں،، اناگہ برمشے بیت-من چَک جت چارت-منی پُشت ءَ یک مادگیں کُچکّےاوشتاتگ ات کہ لاپ ئےِ ھم پُر اَت دُمب ءَ سُرینگءَ لگّت من جست کت"تو شپ ءِ نیم ءَ اد ءَ چی کن ئے؟

گشت ئےِ" جست ءَ مکن-من نوں سکّ درمبرتگاں،،

باریں گپّ بجن؟

تو سیر کتگ؟،،

ھو منارا چاردانگ چُک ھم است- چیا زاناں؟

گڑا گوں تو گپّ جنگ بیت،،

آئی ءَ گیگ کت ءُ منی کش ءَ نشت پدا گپّ ءَ لگّت"منی کسّہ باز دراج انت بلے تو منارا بگش مردم روچ ءِ چُنت بر ءَ جان شود انت؟

من بچکندت ءُ گشت" کدی یکبرے کدی دوبر ءَ-تو پرچہ جست کنگ ءَ ئے ؟،،

"لھتیں دراھیں روچ ءَ جان شود ایت؟،،

" شودگ ءَ شودیت بلے آ زیت نادراہ بنت،،

من ساری ءَ جان شودگ نہ زانتگ- من وھدے کسان بیتگاں منی مات ناھدا چارک ءِ لوگ ءِ دپ ءَ بیتگ پدا منارا یک گونڈویے ءَ وتی لوگ ءَ بُرت ایشاں گوں من ءَ لیب کت ءُ شرّیں ورگ ھم دات بلے وھدے من مزن بیتاں یکروچے پہ ترءُ تاب ءَ ڈنّ ءَ شتاں لالو ءِ کُچکّ ءَ منارا بڈّت ءُ گشت ئےِ "بریں تیاب ءَ جان شودیں،،پدا من وتی لوگ ءَ شتاں منی پُٹ ترّ اتنت گڑا لوگ ءِ مردماں منی سرا شک بیت پدا آھاں من ءَ چہ وتی لوگءَ درکت-،،

پدا گریوگ ءَ لگّت ءُ گشت ئےِ" من مزنیں ردے وارت ھماروچی جان شُشت،، من آئی سر ءَ را مرزت تسلّہ دات ءُگشت "گوستگیں گپّانی سرا نزور دل گریونت نی وتی باندات ءِ پگر ءَ بکن ،،

پدا گشت ئےِ "انّی من ءَ چہ آپ ءَ تُرسیت-اولی روچاں من ءَ جان شودگ وش بیتگ بلے انّی منی ھیال ءَ ترمپے آپ پورہ آرت ءِ گونی یے-ھمے ترمپ ءِ چست کنگ ءِ زور ھم من ءَ نیست-انّی ھَشت کُچکّ منی پشت ءَ اتنت ءُ گشگ ءَ اتنت بریں جان شودیں بلے من تتکاں-انگت ءَ دو ءَ تچگ تچگ ءَ منارا آپ پرریتک-من سک ژنداں- منی سرین درد ءَ انت-اے جاہ گیش درد کنت بچار.....،

آئی ءَ منی دست گپت ءُوتی سرین ءِ نیمگا بُرت-من آئی ءِ سرین گوں ماتی لنکک ءَ زور پردات ءُ جست کت اد ءَ؟ گشت ئےِ "اِناّں کمیں جھل ترا.... ھم... ھم... ھمدا... ھمد ءَ درد کنت...،،

من ءَ آئی جاور ءِ سرا بزگ بئیگ ءَ ات ءُ جست کت" انّی اگاں کسے ترارا وتی لوگ ءَ ببارت؟آئی ءَ منی گپّ کپّی کت ءُ گشت"تو منءَ وتی لوگ ءَ برئے؟ منی لوگ ءَ یک کُچکّے وَ ساریءَ ھست بلے منی بَلُک ایوک انت-من ترا ھمائی لوگ ءَ براں ءُ زان ئے ترا اود ءَ چی کنگی انت؟

من زاناں من ءَ شپاں آگاہ بئیگی انت ءُ راشگی انت-،،

من آ وتی ھمراہ کت ءُ بَلُک ءِ لوگ ءَ آؤرت-بَلُک نُرنڈگ ءَ لگّت" اے چی بلاھے تو آؤرتگ-اے تئی چی درد ءَ وارت-،،

من بَلُک ءَ را سرپد کت ءُ گشت"اے ھمدا انت-اے تئی ھاترا بے وابی سگّیت ءُ اگاں ایشی ءَ تئی ھیال نہ داشت گڑا لَٹ تئی کش ءَ ایر انت-،،

پدا من ھر شپ شت ءُ بَلُک ءُ آئی ھال پُرسی کت-بَلک چہ آئی ءَ سک وش بَلک ءِ یک مزنیں پگرے ھمیش ات کہ منی کُکڑ گار بئیگ ءَ انت بلے نوں گیشتر بیان ات انت-

پدا لوگ ءِ تھا ھپت دانگ کُکڑ ترگ ءَ لگّت-منی ھُب ھم گیشتر بوت پرچا کہ منی بَلُک مدام آئی توسیپ کنگ ءَ ات-من آئی گیشتر ھیالداری کت ءُ مدام شرّیں وراک دات-داں وتی چُکّاں گیشتر شیر بہ دنت-

نوں آئی چُکّ مزن بیان اتنت- نوں آھاں شیر ھم یلہ کتگ ات-

یک شپے من کہ اود ءَ سر بوتاں، آ اود ءَ نہ ات-من چہ بَلُک ءَ جست گپت "مرچی زاھر نہ انت کجا شتگ؟ ،،

ھبر منی دپ ءَ ات کہ آ پُترت-من چُپ بوتاں بلکین آ دل ءَ بیار ایت-

دومی شپ ءَ منی کرّا اتک نشت پدا گپّ ءَ لگّت" بشاّم سکّ بزگ انت-بے چارگ ءِ لوگ سکّ مزن انت-آئی لوگ ءَ یک کُچکّے ھم ھست بلے لوگ ءَ دلوت ھم باز انت-نوں گرماگی شپ انت-ملک ءَ دُزّانی ھم شور انت- کُلّیں مردم ڈن سرا وپتگ انت- آھانی لوگ ھم یلہ انت-اگاں تو دل ءَ میار ئے من شپ ءَ ھمود ءَ بہ رواں؟

اد ءَ چُکّ وَ ھست انت-نوں مزن انت راشگ ھم زان انت-،،

من لوٹ ات جست ئےِ بکناں آئی ءَ منا گپّ جنگ ءِ موہ نہ دات ءُ گشت ئےِ "من زاناں تو چی جست گرگ لوٹ ئے.... ھو بشام ءِ کُچکّ نرازے،،

من آئی چمانی توک چارت-چہ آئی چماّں دو ترمپ ارس پہ شیپ گرگ ءَ ساڑی ات انت-