دستونک - میجر مجید

وتن دیوانگیں شائر مبارک کازی ءِ یاتءَ

منی راجءِ دگہ تْرندیں توارے شُت

وتن دیوانگیں یک سرمچارے شُت

منی شوانگ، منی بگجَت، منی میدءِ

گم ءُ رنجانی سِتکیں رازدارے شُت

مُلور انت جِنّ ءُ اِنس ءُ گُنگدام شھرءِ

کہ چو منسورءَ ھکّ ءِ پاسدارے شُت

پد ءَ بژنیگ منی راجءِ یلیں کوہ مرد

پد ءَ مئے راجی پِربندانی یارے شُت

پچ اِنت پتّر پد ءَ پُرسءِ بلوچ ڈیھءَ

اتا ءُ پازُلیں یک یادگارے شُت

په زوراک ءُ لگوریں راجی رھشوناں

دگہ زاگ داتگیں زِبریں سگارے شُت

زبان ءُ راج ءُ لبزانکءِ کَرُتک بُرجے

بلوچڈیھءِ دگہ مئے دوستدارے شُت

تئی پولگ، تئی وانگ، تئی زانگ

منی ڈیھءِ ملنگیں پولکارے شُت

گمیگ انت سمّی ءُ سازین ءُ دُربی بی

گریب ءُ بزگرانی سِتریں شارے شُت