مبارک کازی ءِ نمدی

اے زمانگ ءَ کہ جون 1982 انت چہ شال ءَ ماھتاک " زمانہ " درکپگ ءَ انت۔من ھیال کناں اے وھد ءَ مبارک چہ مچھ ءِ زندانءَ درکپتگ ءُ کراچی ءَ انت چہ آئی ءِ اے نمدی ءَ زانگ بیت۔

گراں مہزبیں شونکار!

منی بزرگیں واجہ من "زمانہ" ءِ معرفت ءَ بلوچی زبان ءِ نوکیں شاعرانی ڈس ءُ نشان لوٹ اتگ انت بلے چو کہ ما نوں چہ بندی جاہ ءَ درآیگی یاں پمیشکا چہ شاعراں دزبندی انت کہ وتی زند ءِ ھال ءُ اھوال ءُ گال ءُ گپتاراں مارا جھل ءِ ڈس ءُ نشان ءَ رواں بدئینت۔پربند ءُ گال قومی بزاں راجی یا آشوبی بُوگ المّی انت۔

شمے زھگ: ۔ مبارک قاضی

پتہ:۔ کے ایم سی بلڈنگ لی مارکیت کراچی ۔2

زمانہ تاکدیم 54

مئی 1982

چہ شونکار ءَ مبارک شاعرانی ڈس ءُ نشاناں پمیشکا لوٹگ ءَ انت کہ دلمانگ انت چہ مچھ جیل ءَ "بلوچی کتابے" رد ءُ بند بدنت۔

بیا چاریں مبارک کجام شاعرانی ڈس ءُ نشاناں لوٹگ ءَ انت۔ شما اوں جْوانی ءَ سیل کت کن ات کہ اے لڑ چونینے بیتگ۔

فروری1982 ءَ ماھتاک زمانہ ءِ شونکار ءَ چو نبشتگ کنت۔

واجہ حاجی عبدالقیوم سلامت بات ئے

گوں شما مئے یک دزبندی یے ھست آ اے کہ ما لوٹیں چہ اد ءَ یک " بلوچی کتابے" رد ءُ بند بکنیں کہ آئی ءِ تہ ءَ بلوچی نوکیں شاعرانی شعر بہ بنت۔اے رد ءَ مارا لھتیں شاعرانی ڈس ءُ نشان ءَ پہ کار انت۔ گوں شما دزبندی انت کہ مئے اے جار ءَ شنگ بکن ات ءُ چہ شاعراں لوٹیں کہ آ وتی ڈس ءُ نشاناں زمانہ ءِ معرفت ءَ تچک ءَ مئے سر ءَ رواں بکن انت تنکہ ما گوں آھاں کاگد ءُ کراچ کت بہ کنیں۔

شمے مہربانی بیت ءُ بلوچی ءِ نوک نہالیں شاعرانی منتّ! آ شاعرانی کہ مارا ڈس ءُ نشان لوٹیت آچوش انت۔ خلیل آبسری،محمد کریم آزات، ابرار گرمکانی،ابراہیم عابد، عثمان غریب، ناز بلوچ، ادریس بلوچ ،طارق بلوچ، نصیر دشتی،نثار جلیل،ڈاکٹر فضل فیضی،طاہر جمالدینی، لال محمد مہر،گل جان گل،رحیم بخش شوھاز،غلام حیدر ارمان،واحد بخش راہی، عنایت اللہ قومی،سرفراز بلوچ،الہی بخش فدا،حسن علی سہل، ماسٹر مجید گوادری،پیربخش پیرل،لطیف عادل،غلام حسین شوہاز،علی ابرار،چاکرعلی ابرار، ءُ دگر ہر چی بلوچی شاعرے کہ گوں زبان ءُ لبزانک ءَ دوستی دارایت وتی وتی ڈساں مارا راہی بکن انت یا زمانہ ءِ نشان ءَ وتی ڈساں روان بکن انت۔منتوار۔مئے اے کاگد ءَ الم ءَ چاپ بکن ات

شمے ھمکار

مئے ڈس:۔ مبارک قازی،سلیم بلوچ

معرفت ، جمعہ خان کرد جنرل اسٹور

مچھ بولان (بلوچستان)

زمانہ تاکدیم 50تا 51۔

اے سلیم منی دل ءَ سلیم کرد بیت۔ اے رنگیں تاکے من نہ دیستگ۔ چہ اے شاعراں بازینے رپتگ نزاناں کازی ءَ اشاں کاگد ءُنمدی نبشتگ کہ گپ گوں جارتاکءَ ھلاس بوتگ۔ اے لڑ ءِ شاعرانی تہ ءَ چندیں ھست ءُ سلامت انت ھما گْوشت کن انت کہ کازی ءَ گوں آیاں اے رِد ءَ ھال کتگ ؟ بلکیں جْوانتریں پسّہ ءَ کریم بلوچ ءُ کھدہ علی دات بکن انت کہ ھما موسم ءَ گوں مبارک ءَ مچھ ءِ زندان ءَ بیتگ انت۔