Family Planning نبشتہ کار: ازرائیل یوزُلَر رجانک: رُژناہ بلوچ - دومی بھر

دومی بھر

"تو اے وھد ءَ لوگ ءَ چوں اتکگ ئے؟ تئی سیمسٹر ھم ھلاس نہ اِنت ءُ من ھم ترا گُشتگ کہ من ھر یکشمبے تئی کِرّ ءَ کایاں! منی ارواہ، تو وش ئے ناں؟ اگاں ترا زَرّ درکار اِنت؟" جسٹس ءَ وتی جنین جُست کُت کہ بَرانڈہ ءَ اُشتوک اَت۔ جسٹس ڈَنّ ءَ رؤگ ءَ اَت ورگ گرھگ ءِ واستہ کہ آئی ءِ لوگ بانُک لوگ ءَ نہ اِنت۔ آ وتی گاڈی ءَ نِشتگ اَت وھدے ایملیہ آیگ ءَ دیستے گڑا، آ گاڈی ءَ چہ ایر اَتک۔آئی ءِ جنین سَک تُرسگ ءَ اَت۔

"من وش نہ آں، من ءَ تئی گوما ھبر کنگی اِنت۔ اے ھبر من ءَ واب ءَ ھم نیلگ ءَ اِنت۔ من ونت ھم کنگ ءَ نہ آں ھمے جیڑہ ءِ وجہ ءَ۔ ھمے آترا من زُوت آتک آں لوگ ءَ۔ برے لوگ ءِ تہ ءَ رواں ھمود ءَ گیشتریں ھبراں کناں۔" ایملیہ ءَ وتی مرد بَگَل ءَ کُت ءُ گُشت۔ جسٹس ءَ جنین ءِ دست گِپت ءُ لوگ ءَ بُرت۔ اشانی لوگ سَک مزنیں۔ سیمسٹر ءِ بندات ءَ ایملیہ لوگ ءَ اتکگ آئی ءَ پَد آ اید ءَ نیتکگ چیا کہ آئی ءِ مرد وت آئی ءِ چارگ ءَ ہاسٹل ءَ شُتگ۔

"چے جیڑہ اِنت منی جان؟" جسٹس ءَ جُست کُت، کہ آئی ءِ سَرِینّ ءَ نِشتگ۔ اے دمان ءَ TV ءِ سرا بوب مارلو ءِ سوتے گوں بُرزیں توار ءَ پِر اَت۔ ایملیہ شُت توارے کِم کُت۔

" من لاپُرّ بیئگ لوٹاں۔" ایملیہ ءَ گُشت۔ وھدے آ لوگ ءَ آیگ ءَ اَت آئی ءَ وتی ارادہ مَٹ کُت۔ آئی ءَ اے پیسلہ زُرت کہ لاپُرّی ءِ بابت ءَ مرد ءَ ھچ ھال ندیاں۔ آئی ءَ ھمے جیڑاِت کہ انچیں چیزے کناں کہ مرد ھمے بہ پھم اِیت کہ چُک ھمائی ئیگ اِنت۔ بلے جیڑہ اِش اَت کہ نسل بندی وجہ ءَ مرد آئی ءَ لاپُرّ کُت نہ کَنت۔ اگاں چُوش بوتیں گڑا آئی ءَ مرد ءَ گوں وپت ءُ واب کُتگ اَت ءُ لاپُرّی ءِ زِمّہ وار ھما کُتگ اَت۔ بلے اے وڈ ءَ آئی ءِ جیڑہ ھلاس نہ بیتگ اَت۔ گڑا آئی ءَ دگہ راہے پَٹّ اِت کہ مرد ءَ رازیگ کناں ءُ پرٹیلیٹی کلینک ءِ ھما جمینتگیں آپ ءَ کارمرز کنائیناں۔

"من اوّلی چُکّ ءِ واستہ چار سال ودار کُت نہ کناں۔ من زاناں کہ من انگت کسان آں بلے من چُک آرگ لوٹاں، من لوٹاں کہ ما وتی چُکّ ءِ ھیال بداریں، چیا کہ انگت ما کسان ءُ جوان اِنت۔" ایملیہ ءَ اے گَپ کُت اَنت، اے دمان ءَ آ سَک پریشان گندگ آیگ ءَ اَت۔

"اے جیڑہ ءَ ترا ہاسٹل ءَ چہ ایدا آرتگ؟ وھدے تو گُشت کہ چیزے تئی تئی دماگ ءَ اِنت ءُ ترا Disturb کنگ ءَ اِنت، من ھمے پھم اِت کہ بلائیں جیڑہے کہ گوں ما گیش ءُ گیوار کنگ نہ بیت۔" جسٹس ءَ گُشت، ایملیہ ءَ کُرشی ءِ کَش ءَ اُوشتاتگ اَت، وتی دستے بُرت جسٹس ءِ کوپگ ءِ سرا ءُ آئی ءَ دوست دارگ ءَ اَت۔

"من ترا باند ءَ پرٹیلیٹی کلینک ءَ بَراں۔ پریشان مہ بی۔ اگاں تو لوٹ ئے کہ مئے چُک انّی بہ بیت گڑا من تئی اے پیسلہ ءَ تئی پِلّہ مرزی ءَ کناں۔ بلے وانگ ءِ نیام ءَ ترا شاھدربرجاہ ءَ ءُ ہاسٹل ءَ ترا باز ھیال دارگ لوٹ اِیت۔ وھدے ما چُک ءِ واستہ ساڈی بئیں گڑا مئے رُوٹین ھم بَدَل بیت۔ تو پَکائی ءَ پیسلہ زُرتگ کہ تو ماتے بوھگ لوٹ ئے؟ ءُ وانگ ھم لوٹ ئے؟" جسٹس ءَ وتی جنین جُست کُت۔

"ھئو من ساڑی آں۔ منی لھتے ھم مکتبی ھم لاپُرّاں ءُ آ وتی کلاسزاں ھم زیرگ ءَ اَنت۔ انگت یکّے ءَ چُکّے ھم ھست ءُ آ وتی چُک ءَ گوں کلاس ءَ کئیت۔ من زاناں من کُت کناں تئی گوما ھوار۔" ایملیہ ءَ گُشت، آئی ءِ دیم رُوک بیت وھدے آئی ءَ دیست کہ آئی ءِ مرد رازیگ بیئگ ءَ اِنت باندا آئی ءَ پرٹیلیٹی کلینک ءَ بَرَگ ءِ واستہ۔

"شرّیں! اگاں تو ھمے لوٹ ئے گڑا ھمے بیت! ما باندا رویں کلینک ءَ، من تئی وشّی یے واستہ ھرچی کُت کناں۔ اگاں تو لوٹ ئے کہ ما چُکّے بیاریں گڑا من ترا مکن چوں کُت کناں؟" جسٹس ءَ گُشت۔

"منتواراں منی زند ءِ ھمراہ! من سَک گَل آں۔ تو یک بلائیں کوہے پروشت پہ من۔ من جیڑاِتگ کہ تو بلکیں مکن کن ئے من ءَ۔ من رواں تئی واستہ ورگ جوڈ کناں۔ تو چے ورگ لوٹ ئے؟" ایملیہ ءَ کندگ ءَ گوں وتی مرد جُست کُت۔

"من سبزی ءِ سُوپ ورگ لوٹاں۔" جسٹس ءَ گوں بچکندگ ءَ گُشت۔ ایملیہ نزّیک ءِ بازارے ءَ شُت پہ سبزی گِرھگ ءَ دانکہ وتی مرد ءِ واستہ سوپ جوڈ کُت بہ کنت۔ آئی ءَ انچیں وشّیں سوپ جوڈ کُت کہ آئی ءِ باز وارت۔

دومی روچ ءَ آ پرٹیلیٹی کلینک ءَ شُت اَنت، ءُ ڈاکٹر ءَ گوں Appointment ءِ واستہ دستبندی یے کُت۔ ڈاکٹر ءَ آ زُوت وھد دات اَنت 

"ما چُکّ ءِ پیداک کنگ واستہ ساڑی اِنت۔" ایملیہ گَل ءَ بال اَت گشئگ ءَ اَت۔ ھئو آں! اے وشّیں ھالے، من گُشتگ شما بلکیں پنچ سال ءَ داں آپاں جمین ءِ۔ شما چوں زُوت چوں پیسلہ زُرت؟ ڈاکٹر ءَ جُست کُت۔

"ما ھمے وجہ گُشت کہ ما انّی جَوانیں ءُ انّی چُک ءِ آرگ شرتریں۔"جسٹس ءَ گُشت۔

"شرّیں، اگاں شما لوٹ اِت گڑا ما پروسیجر ءَ دیما بریں۔ اوّلی ھبر، ایملیہ تئی ماہواری کدی اتکگ اَنت؟" ڈاکٹر ءَ جُست کُت۔

"یک ماہ بیت کہ نیتکگ اَنت۔" ایملیہ ءَ پسّو دات۔

"شرّیں، گڑا من ءَ تئی یک لاپُرّی ٹیسٹے کنگ کپیت۔ اگاں تو لاپُرّ نہ ئے گڑا مارا انگت یک ماہ ودار کنگ کپیت تئی ماہواری ءِ ریدم ءِ واستہ۔ پرٹیلائیزیشن ءِ واستہ الّمی اِنت کہ تئی ماہواری بیا اَنت۔" ڈاکٹر ءَ گُشت۔ ایملیہ ءِ دل ءَ تُرسے ودی بوت وھدے ڈاکٹر ءَ گُشت کہ لاپُرّی یے ٹیسٹ بیت۔

"من باندا ترا لاپُرّی ٹسٹ نِبشتہ کناں دیاں۔" ڈاکٹر ءَ گُشت، آئی ءَ ایملیہ ءُ جسٹس گُشت اَنت کہ باندا پدا بیا اِت۔ 

"ڈاکٹر لاپُرّی ءِ ٹیسٹ ءَ پرچا کنگ لوٹ ایت؟ وھدے کہ آ زانت من ھچ جنین لاپُرّ کُت نہ کناں۔" جسٹس ءَ وتی جنین جُست کُت۔

"پِکر مکن منی ارواہ، من زاناں اے انچیں تِبّی Procedure پروسیجرے۔ اے زانتکاریں ڈاکٹرے۔" ایملیہ ءَ بچکندگ ءَ گوں گُشت۔ بلے آ تہا چہ نَپس گیر اَت۔ آئی ءَ اے چیز شَر زانت کہ لاپُرّی ٹیسٹ آئی ءِ درائیں رازاں پاشک کَنت۔

"من ءَ وتی دیمترے واستہ چیزے جیڑگی اِنت، اگاں من چیزے مہ جیڑاں گڑا ڈاکٹر منی رازاں پاشک کنت۔ ءُ من اے چیز بوھگ ءَ نیلاں۔" ایملیہ درمان جاہ ءَ چہ درآیگ ءِ وھد ءَ جیڑگ ءَ اَت۔

سیمی بھر ءِ ودار ءَ بکن اِت۔

Family Planning 

نبشتہ کار: ازرائیل یوزُلَر 

رجانک: رُژناہ بلوچ