Family Planning نبشتہ کار: ازرائیل یوزُلَر رجانک: رُژناہ بلوچ - سیمی بھر

سیمی بھر

"دروت! تئی نیم روچ وش بات ڈاکٹر ۔ اے من آں ایملیہ، من وھدے روچ ءَ نادرہ جاہ ءَ اتک آں من ءَ گوں تو ھبرے کنگی اَت، انچیں ھبرے کہ مرد ءِ دیما گُشت کُت نہ کُت۔ 

ھبر اِش اِنت کہ من ءَ تئی کُمَک درکار اِنت۔" ایملیہ ءَ گوانکو ءِ سرا گُشت، ڈاکٹر ءَ آئی ءِ توار ءَ چہ زانت کہ جیڑہے ھست۔ شپ ءِ ھشت کلاک اِنت ایملیہ ءَ گوانکو زُرتگ ءُ پَسِیلّ ءَ شُتگ ءُ ڈاکٹر ءَ گوں ھبر ءَ اِنت۔ آئی ءَ لوٹ اِتگ کہ آ لاپُرّی ٹیسٹ ءَ روگ ءَ ساری ڈاکٹر ءَ وتی جیڑہ ءَ بہ گُشیت ءُ وتی نیمگ ءَ بہ کَنت۔ آئی ءَ اے ھبر شَرّ زانتگ کہ اگاں آ ڈاکٹر ءَ وتی نیمگ ءَ مہ کَنت گڑا بانداتیگیں لاپُرّی ٹیسٹ ءَ آئی ءِ درائیں راز پاشک بَنت۔

"جیڑہ ءِ جند چی اِنت؟ من اُمیت کناں کہ تو جوڑ ئے؟ چے پیمیں کُمَک درکار اِنت ترا منی؟ تو نادرہ ئے یا دگہ جیڑہے؟" ڈاکٹر ءَ ایملیہ جُست کُت۔ آ وتی نیمروچ ءِ شِپٹ ءَ پَد نوکی لوگ ءَ روگ ءَ اَت ءُ وتی گاڈی یے کِلیتے دست ءَ اِت اَنت کہ ایملیہ ءِ زَنگ اتکگ اَت۔

"ڈاکٹر، من یک بلائیں جیڑہے ءِ نیام ءَ سَک ھراب پَس اِتگ آں۔ من چوش ھم نزاناں کہ چے پیم وت ءَ چہ ایشی ءَ بہ کَشّاں۔ من ءَ وت ءَ ءُ وتی زندگی چہ اے جیڑہ ءُ پریشانی ءَ ھر پیم کَشئگی اِنت۔ من ءَ تئی کُمَک درکار اِنت۔ تو منا اے ھبر ءَ باور بہ کنائین کہ اے گپ تھنا مئے دوئینانی نیام ءَ بیت۔ مھربانی بکن، ھمے ھبر ءَ کہ من ترا گُشاں، ایشی ءَ تو وتی ھَدّ ءَ داشت کن ئے ؟" ایملیہ ءَ جُست کُت ڈاکٹر۔ آئی ءَ پَسِیلّ ءِ تَھتَگ تِکا داتگ اَت ءُ لَھمیں توار ءَ ھبر ءَ اَت۔

"تو وتی جاندَرائی ءِ بابت ءَ گوں من ھبر کُت کن ئے۔ من یک زانتکاریں ءُ سوہویں ڈاکٹرے آں۔ ءُ وتی نادرہ ءِ رازاں کَسّ ءَ نہ گُشاں۔ اے بابت ءَ تئی ھرچ پیمیں جیڑہے است من ءَ بہ گُش، من جُھد کناں کہ آئی ءَ گِیشّ ءُ گِیوّار بہ کناں۔" ڈاکٹر ءَ ایملیہ گُشت۔ ایملیہ ءَ دراجیں ساہے کَش اِت ءُ درائیں ھال ڈاکٹر ءَ دات اَنت۔

"من لاپُرّاں پیسرا چے۔ بلے جیڑہ اِش اِنت کہ اے چُک منی مرد ءِ نہ اِنت۔ ءُ من نہ لوٹاں کہ منی مرد بہ زانت کہ من لاپُرّاں ءُ اے دِگرے یے چُک اِنت۔ما وھدے مرچی نادرہ جاہ ءَ اَتکیں من ھمے پَھمتگ اَت کہ تَچک ءَ لیب ءَ رویں، ءُ من ترا اے ھبر ءَ ھمودا گُشاں کہ من لاپُرّاں پیسرا چے۔ بلے تو گُشت کہ لاپُرّی ٹیسٹ لُوٹ اِیت گڑا من سَک تُرس اِتاں۔" ایملیہ ءَ گُشت، آ اے سَھت ءَ گریوگ ءَ اَت ءُ جیڑگ ءَ اَت کہ آئی ءِ ارس ڈاکٹر ءِ دل ءَ پہ آئی ءَ نرم کناں۔ آ بے ترْک ءُ توار بیت کہ ڈاکٹر نوں چے گُشیت۔

"تو نوں چے لُوٹ ئے کہ من چے بہ کناں؟" ڈاکٹر ءَ جُست کُت۔ ءُ آئی ءَ زانت کہ آ چے لُوٹ اِیت۔ اے اوّلی رَند نہ اِنت کہ یک نادراہے ءِ لاپُرّی ءِ جیڑہ آئی ءَ چیر داتگ، اے پیمیں جُگاڈ آئی ءَ پیسرا ھم باز کُتگ۔

"تو من ءَ چہ شرتر زان ئے کہ ترا چے کنگی اِنت، ءُ اے ھبر ھم سد درسد راستیں کہ من لاپُرّاں، تو بس منی مرد ءَ بہ گُش کہ من پرٹائل ءِ واستہ ساڑی آں۔ ءُ پرٹیلائیزیشن ءِ پروسس بیئگ ءَ اِنت۔ تو بس منی مرد ءَ بہ گُش کہ تو آئی ءِ جمینتگیں آپ کارمرز کُتگ اَنت کہ تئی کِرّا بیتگاں۔ تو ھمے وڑا منی کُمَک ءَ کُت کن ئے، تو اے جیڑہ ءَ ھمے رنگ ءَ گِیشّینت کن ئے کہ منی لاپُرّی ءَ انگت چیزے ھپتگے، تو بس آئی ءَ باور بہ کنائین کہ اے آئی ءِ پرٹیلائیزر اَنت کہ من چہ ایشاں لاپُرّاں۔ بس ھمینچو! من سوگِند وراں کہ من ترا اے کار ءِ کنگ واستہ سوگاتے دیاں، اگاں تو منی اے ردی ءَ چیر بدی یے۔" ایملیہ ءَ گُشت۔

"اے کار ءِ واستہ تو من ءَ چِینکس کلدار دئے؟ تو زان ئے اے باز ترسناکیں کارے منی واستہ کہ منی تِبّی لائسنس ھم منی دست ءَ چہ شُت کَنت۔ اگاں کَسے سرپد بہ بیت کہ من اے کار ءَ تئی کُمَک کُتگ۔ من ءَ شَریں سوگاتے لوٹ اِیت اے کار ءِ واستہ کہ من تئی واستہ کنگ ءَ آں۔" ڈاکٹر ءَ گُشت۔

"من ترا نائیجیرین دو ملیون دیاں اگاں تو منی ردی ءَ چیر بدی یے۔ بس اے کار ءَ شَرُی ءَ بہ کن دانکہ کس سرپد مہ بیت۔" ایملیہ ءَ گُشت۔ آئی ءِ مرد زَردارے ءُ آئی ءِ اکاؤنٹ ءَ یَکوئی زَرّ راہ دَنت۔ آئی ءَ زَرّ ءِ ھچ جیڑہ نیست، ھما روچ ءَ چے کہ آئی ءِ گوں جسٹس ءَ نَزّیکی بوتگ۔

"شریں! تو ھمے بہ زان کہ تئی کار بیتگ۔ من تئی راز ءَ چیر دیاں باندا۔" ڈاکٹر ءَ گُشت۔

دومی روچ ءَ، ایملیہ ءُ آئی ءِ مرد پرٹیلیٹی کلینک ءَ شُت اَنت، انچوش کہ آیاں جیڑگ اِتگ اَت۔ ڈاکٹر ھم وتی ھساب ءَ کار ءَ اَت انچوش کہ آئی ءَ گوں ایملیہ ءَ سوڈاِتگ اَت۔ ڈاکٹر ایملیہ ءَ گوں تھنائی ءَ لیب ءِ تھا شُت۔ آئی ءَ نرس ءُ آدگہ ٹیکنیشن ھم لیب ءِ تہ ءَ نیشت اَنت۔ جسٹس ھم تہ ءَ آیگ ءَ اَت بلے ڈاکٹر ءَ مہ کن کُت کہ لیب ءِ تہ ءَ تھنا نادراہ رؤنت۔ آئی ءِ کِرّا دِگہ راہ ھم نیست اَت، پمیشکا ڈاکٹر ءِ ھبرے مَنّ اِت۔ آ ودار جاہ ءَ نِشت وھدے ڈاکٹر ءَ ایملیہ لیب ءَ بُرت۔ آ دو کلاک لیب ءِ تہ ءَ بؤگ ءَ پَد دراَتک اَنت۔

"مراد بہ بیت! تو ءُ تئی جنین شَرّیں وھدے ءَ اَتکگ ئے۔ اے پروسیجر ءِ واستہ تئی جنین انّی شَرّ اِنت ءُ ما اے کار ءَ کُت کنیں۔ ءُ من اُمیت کناں کہ اے لاپُرّ بیت وھدے رپورٹ کاینت ءُ من شمارا انّیگ ءَ چہ مُراد باتی دیاں۔" ڈاکٹر ءَ جسٹس گُشت۔ جسٹس سَک گَل بیتگ ءُ گَل ءَ چے آ پاد اَتک ءُ وتی جنینے بَگَل ءَ کُت ءُ دوست داشت۔ وھدے آ نادراہ جاہ ءَ چہ دَراَتکاں ایملیہ ءَ دو ملین نائیجیرین ڈاکٹر ءِ اکاؤنٹ ءَ مان کُت۔

یک ماہے پَد، وھدے آ نادرہ جاہ ءَ شُت اَنت پہ لاپُرّی ٹیسٹ ءِ واستہ، اے ٹیسٹے نبیتگ۔ اے تھنا اشانی ھمے سوڈاِتگینانی بھرے بیتگ کہ ایملیہ ءُ ڈاکٹر ءَ کُتگ اَنت۔ دمانے ءَ پَد ڈاکٹر ءَ جسٹس گُشت کہ تئی جنین لاپُرّ اِنت۔

"تو زُوت یک پِتے جوڑ بئے، چُکّ ءِ نام چے اِیر کن ئے؟"ایملیہ ءَ وتی مرد جُست کُت۔

"من یک جوانیں نامے جیڑگ ءَ آں، بلے پیسرا بریں لوگ ءَ شاتکامی کنیں۔ من انچوش گَل آں کہ من پِتے جوڑ باں۔" جسٹس ءَ گُشت۔ آئی ءَ جنین ءِ دست گِپت ءُ گاڈی ءِ نیمگ ءَ روگ ءَ اَت۔ ڈاکٹر ءَ آیانی نیمگ ءَ چاراِت ءُ سَر سُرینگ ءَ لَگ اِت۔

"چوں لَجّ ءِ ھبرے! اگاں مرد بہ زانت ک چے بوھگائیں! ھئیر! ایدا من ءَ کار نیست، من ءَ بس زَرّ لُوٹ اِیت۔" ڈاکٹر ءَ دل ءِ تہ ءَ گُشت۔

چارمی بھر ءِ ودار ءَ بہ کن اِت۔

Family Planning 

نبشتہ کار: ازرائیل یوزُلَر 

رجانک: رُژناہ بلوچ