Family Planning نبشتہ کار: ازرائیل یوزُلَر - رجانکار: رُژنا بلوچ - چارمی بھر

چارمی بھر

شش ماہ بیت کہ ایملیہ ءَ وتی لاپُرّی یے ھبر شرّیں وڑے ءَ چیر داتگ، ءُ آئی ءِ زند شرّیں رنگے ءَ گوَزگ ءَ اِنت۔ ایملیہ ءِ مرد آئی ءِ سرا باز ھرچ کنگ ءَ اِنت ءُ آئی ءَ دوست ھم دارگ اِنت۔ ایملیہ ءِ اوّلی سیمسٹر ھم ھلاس بیت۔ آ اتکگ لوگ ءَ وتی مرد ءِ کِرّ ءَ، مرد ءَ ھم وتی کار ءَ چہ چُٹّی زُرتگ دانکہ آ جنین ءَ وھد دات بکنت کہ آ لاپُرّ اِنت۔ ءُ کمپنی ءِ جند ھم آئی ءِ وتیگ اِنت۔

پمیشکا آئی ءِ واستہ اے چوشیں جیڑہے نہ اَت۔ ءُ آئی ءَ وتی ھمکاراں گُشتگ کہ آیوکیں 3 سئے ماہ ءَ من ءَ ھچ پیما کار مدار اِت۔ ھما وھد ءَ کہ شُما زان ئے باز زلُوری کارے ءُ بے من ءَ نہ بیت۔

اے نیام ءَ آیاں یکّے دومی ءِ گوما شرّیں وھدے گوازینت، جِتا جِتائیں جاہاں پہ سِیل ءُ گَردَگ ءَ شُتگ اَنت۔ ءُ انچیں Activities ءِ کُتگ کہ آیانی نیام ءَ شرّیں نَزّیکی یے ودی بوت۔

یکشمبے ءِ بیگاہ ءَ ایملیہ ءِ گوانکو توار ءَ اَت، آئی ءِ چم وھدے گوانکو ءَ کَپت اَنت، آئی ءَ دیست کہ ڈاکٹر ءِ اِنت کہ پرٹیلیٹی کلینک ءَ آئی ءِ لاپُرّی رازاں چیر ءُ اندر کنگ ءَ آئی ءَ کُمَک کنگ ءَ اِنت۔

"من ءَ دِگہ دو ملین نائیجیرین لوٹ ایت۔ ھما اکاؤنٹ ءَ روانے بدئے کہ تو پیسرا روان داتگ اَت۔ 24 کلاک ءِ تہ ءَ اے زَرّ من ءَ لوٹ اَنت۔" آ سَک ترندیں توار ءَ گوں ھبر ءَ اَت ءُ آئی ءَ Call بند کُت۔ آئی ءَ اے ھم نہ گُشت اے زَرّ پہ چی آئی ءَ لُوٹ اَنت ءُ ایملیہ چے گشئگ لُوٹ اِیت۔ ایملیہ ھمے سرپد بوت کہ آ مَسکرا کنگ ءَ اِنت، پمیشکا ڈاکٹر ءِ ھبرے میان نیاؤرت اَنت۔ دومی روچ ءَ ڈاکٹر ءَ پدا Call کُت۔

"من ءَ N2 ملین ءِ میسیج چیا نیتکگ؟ ھمے کہ من چہ ترا لُوٹ کُتگ۔ تو روان چیا نداتگ اَنت؟" ڈاکٹر ءَ ایملیہ جُست کُت۔

"زَرّ چے ءِ واستہ لُوٹ اِیت؟ ھمینچو کہ تو لُوٹ اِتگ، من ترا داتگ۔ نوں دِگہ زَرّ چیا لوٹگ ءَ ئے؟" ایملیہ ءَ جُست کُت، آ اے سَھت ءَ کمپان ءَ تھنا نِشتگ ءُ Red Wine ورگ ءَ اِنت۔

"ترا نوں ھر ماہ N2 ملین روان دیگی اِنت کہ من وتی دَپ ءَ بند بکناں ءُ تئی راز پاشک مہ باں۔ اے رَند  ءَ من ترا گشئگ ءَ آں دیمے رَند ءَ گُشئگ مہ لُوٹ۔ اگاں تو منی ھبر نہ زُرت اَنت گڑا من تئی مرد ءَ درائیں ھالاں دیاں۔ من سُھب ءَ کال کناں تئی مرد ءَ ءُ آئی ءَ گشاں کہ تو چوں لاپُرّ بیتگ ئے دِگہ مردینے ءَ گوں ءُ اے چُک آئی ءِ نہ اِنت۔" ڈاکٹر اے رَند ءَ گیشتر ترندی ءَ گوں ھبر ءَ اَت۔ ایشی ءَ پیسر کہ ایملیہ ھبرے بہ کَنت ڈاکٹر کال ءَ بند کنت۔

"من نوں چے بکناں؟ اے مردین منی سِیر ءَ پُروشگ لُوٹ اِیت۔ راستی ءَ اے ھمے لُوٹ اِیت کہ منی زِند جنجالانی آماچ بہ بیت۔ آئی ءَ وت گشت کہ من ءَ اے زَرّ لُوٹ اَنت، من دات اَنت، آ رازیگ ھم بیتگ۔ نوں اے من ءَ بلیک میل چیا کنگ ءَ اِنت ءُ دِگہ N2 ملین چیا لُوٹگ ءَ اِنت۔ من مزنیں جنجالے ءَ پَسّ اتاں۔ من آئی ءَ وَ ھچ پیما نیلاں کہ منی مرد ءَ ھال بہ دَنت۔ اگاں آئی ءَ وتی دَپ پچ کُت گڑا منی زند ھلاس بیت۔ من زَرّے دیاں۔ بلے من ھر ماہ N2 ملین چوں آئی ءَ دیاں؟ اے چوں اِرسیں مردمے، ایملیہ گوں وَت ھبر ءَ اَت۔ آ پاد آتک ءُ Red Wine آئی ءَ دیما ایر کُت۔ آ پاد آتک اُوشتات، آئی ءِ سرین درد ءَ اَت، آئی ءَ وتی سِرین ءِ چَپّی نیمگ داشتگ اَت۔ آ ھر ھپتگ نِزور بوھاں اَت۔

آ انچو لوگ ءَ پُوتِرت ڈاکٹر ءِ سرا زَرّے روان دات ءُ آئی ءَ کالے کُت بلے ڈاکٹر ءَ کال چست نہ کُت ءُ میسیجے دیم دات۔

"من ءَ زَرّ رستگ اَنت۔ اے انگت بنداتیں، مھربانی بہ کن دیم ءِ ماہ ءِ واستہ زَرّ مُچ کنگ بندات بکن۔ من ءَ وش نہ بیت کہ ھر ماہ ترا بہ گشاں۔ بس ھرچ ماہ ءِ 30 ءَ منی زَرّاں روان بدئے۔ ءُ اگاں تو روان ندات اَنت، من تئی کِسّہ ءَ دُگنیا ءَ اِش کنائیناں۔" ڈاکٹر ءَ میسج دیم داتگ اَت۔ اے میسیج ءِ وانگ ءَ پَد، ایملیہ ءَ زُوت میسیج Delete کُت اَنت۔ چیا کہ آ ھچ پیمیں جیڑہ نہ لُوٹگ ءَ اَت۔

ھمے روچ ءَ بیگاہ ءِ ساھَت ءَ ایملیہ ءِ سنگت ءِ (جیری، کہ آئی ءِ Boyfriend بوتگ) کال اتک۔

"ترا چے لگ اِتگ کہ من سرپد نباں کہ اے چُک منیگ اِنت؟ تو منی گوما اے پیم چیا کُت؟ تو زان ئے کہ اے چُک منیگ اِنت ءُ انگت اے چُکّ ءَ وتی مرد ءِ سرا مُشئگ ءَ اِت؟ ایملیہ ترا ھچ پرواہ نیست۔" جیری ءَ گُشت۔

"جیری من ءَ تئی چُک گون نہ اِنت۔ اے منی مرد ءِ چُک اِنت من ءَ نوں کال مکن ءُ اے پیمیں بکواس ھم مکن۔ من ترا سرپد کنگ ءَ آں، منی زند ءَ چہ دور بہ بو۔ مئے نیام ءَ ھرچی کہ بیتگ آ تھنا ردی یے بیتگ۔ من تھنا وشّی زورگ ءَ بوتگاں۔ ترا اے ھَکّ کئے ءَ داتگ کہ منی گوما اے پیما ھبر بہ کن ئے؟" ایملیہ سَک جزباتی اَت ءُ آئی ءَ گُشت۔ آ ھیران اَت کہ چے پیم بلیک میلرز یکّے ءِ پُشت ءَ یکّے آیگ ءَ اِنت۔

"منی کِرّ ءَ تئی واستہ یک تواربندے است۔ اشی ءَ شرّی ءِ سرا اِش بکن ءُ ترندیں بیھار دیگ ءَ پیسر ھم شرّی ءِ سرا بوسوچ۔" جیری ءَ گُشت۔ آئی ءَ تواربند پَچ کُت، اے آئی ءِ جِند ءِ توار اَت۔ ایملیہ ءَ یات کنگ ءِ جھد کُت، آئی ءَ یات اَتک کہ اے ھما گَپ اَنت کہ اوّلی روچ ءَ گوں وتی دزگھار ایڈنہ ءِ کِرّ ءَ کُتگ اَنت اِش، وھدے آئی ءَ زانتگ اَت کہ آ لاپُرّ اِنت۔

"اے ایڈنہ ءَ تئی سرا روان داتگ؟ ایڈنہ ءَ من ءَ پَدّر کُت۔ اشی ءَ منی زِند برباد کُت۔" ایملیہ باز پَدرد بیت ءُ گُشتے۔ آئی ءَ یات کُت کہ چے پیم آئی ءَ ایڈنہ ءِ کُمَک کُت وھدے آئی ءِ کِرّ ءَ سیمسٹر ءِ پیسانی دیگ واستہ زَرّ نیست اَت۔ آئی ءَ چینچو ماہ ءَ لاپ داتگ۔ آئی ءَ اے ھبر ءَ چے باز درد بیئگ ءَ اَت کہ ایڈنہ ءَ گوں آئی ءَ دَگہ کُتگ ءُ گوں لائک ءَ ھوار آئی ءَ بلیک میل کنگ ءَ اِنت۔

"ترا چے لُوٹ اِیت؟ وتی کیمت ءَ بہ گُش۔" ایملیہ ءَ جیری جُست کُت، آ گریوگ ءَ اَت ءُ جیری اِش کنگ ءَ اَت۔

"من ءَ زَرّ نہ لُوٹ اِیت۔ زَرّ ھرچیز نہ اِنت۔ من ءَ منی چُک لُوٹ اِیت۔ من لُوٹاں کہ تئی مرد ءَ درائیں راستی ءَ بہ  گُشاں۔ آئی ءَ بہ گُش کہ چُکّ ءِ ھَکّیگیں پِت کئے اِنت، چیا کہ وھدے چُکّ پیداک بیت۔ من آئی ءِ رَند ءَ کایاں۔ من ترا پیسرا سرپد کنگ ءَ آں کہ آئی ءَ سرپد بہ کن دانکہ آئی ءَ ھچ رنگیں ردی مہ بیت وھدے من وتی چُکّ ءِ رَند ءَ کایاں۔

"تو زان ئے کہ چُکّ ءَ من ترا ھچ پیما ندیاں، من سِیر کُتگ۔" ایملیہ گریوگ ءَ گوں گُشئگ ءَ اَت۔

"من وتی گَپ کُت اَنت ءُ نوں اے گَپ ءَ ترا دوبَر نہ گُشاں۔" جیری ءَ گُشت ءُ کال بند کُت۔

پنچمی بھر ءِ ودار ءَ بہ کن اِت۔

Family Planning

نبشتہ کار: ازرائیل یوزُلَر 

رجانکار: رُژنا بلوچ