Family Planning نبشتہ کار: ازرائیل یوزُلَر - رجانکار: رُژنا بلوچ - ششمی بھر
ششمی بھر
"جان۔۔۔ پادا۔۔۔ من ءَ لَگ اِیت منی چُک ماتی ءِ وھد بیتگ۔ زُوت کن پادا من ءَ نادرہ جاہ ءَ بہ بَر۔ زُوت کن نا، تو گاڑی ءِ کِلیت ءَ زِیر من ءَ بَر۔" ایملیہ ءَ وتی مرد گُشت کہ اے سَھت ءَ واب اَت۔ جسٹس ءَ مرچی سُھب ءَ ڈَنّی مُلک ءَ روگی اِنت بلے نی شُت نہ َکنت۔ نی آئی ءَ وتی جنین نادرہ جاہ ءَ ھم برئگی اِنت ءُ چُک ماتی ءِ ساھَت ءَ آئی ءِ کِرّ ءَ ھم بیئگی اِنت۔
"اڈے پاد ءَ نا زُوت کن، من ءَ نادرہ جاہ ءَ بہ بَر من دِگہ پیما۔ من ءَ سَک درد ءُ دْور بیئگ ءَ اِنت۔" ایملیہ سَک بے تاھیری ءَ گوں گُشئگ ءَ اَت۔ جسٹس پاد اَتک ءُ گاڈی ءِ کِلیت ءَ شوھازگ ءَ لَگ اِت، آئی ءِ چَم واب ءَ پُرّ اَنت ءُ مِیدے شِنگ اِتگ اَنت۔ آ نزانگ ءَ اَت کہ چے بہ کناں۔ اے آئی ءِ جنین ءِ اوّلی چُکّ اِنت ءُ اشی ءَ پیسر آئی ءَ ھِچ جنین اے رنگیں جاور ءَ ندیستگ۔ آئی ءِ جنین ءِ پِریاتاں چہ آئی ءِ دماگ ءَ کار کنگ یلاس داتگ۔ بازیں پَٹّ و پُول ءَ پَد آئی ءَ کِلیت دَرگیتک اَنت بلے گاڑی ءِ کِرّ ءَ شُت نہ کنگ ءَ اَت کہ آئی ءِ زال تھنا اِنت۔
"جان تو کمّو رؤگ ءِ جُھد بہ کن۔ من ءَ تُرسگ ءَ اِنت، من ترا تھنائی ءَ کمرہ ءَ یلا دات نہ کناں۔ تو کمّو بِریں دانکہ گاڑی ءِ نَزّیک ءَ ما بہ رَسیں۔" جسٹس ءَ گُشت۔ ءُ پدا آئی ءَ کالونی ءِ پانپان کال کُت ءُ توار کُت پہ کُمَک ءَ۔ پانپان اَتک ءُ آئی ءِ کُمَکے کُت دانکہ گاڑی ءَ۔ آ گاڑی ءَ نِشت اَنت ءُ پہ نادرہ جاہ ءَ رھادگ بوت اَنت۔ آ زُوت نادرہ جاہ ءَ رَست اَنت ءُ نرس ءَ آئی ءِ جنین تہا بُرت۔
"پِگر مہ کن واجہ، تئی جنین زُوت لیبر روم ءَ (چُک ماتی ءِ جاہ) برئگ بیت۔ تو دانکہ ودار بہ کن۔" نرس ءَ جسٹس گُشت۔ ایملیہ سَک نِزُور بیتگ۔ جسٹس ءَ ھرچ کاگَزے کہ دزنام جنئگی اَت، جَت اَنت اِش ءُ نِشت۔
دو پُرّیں ساھت ھم نہ گوستگ اَت کہ آئی ءَ وشّیں ھال رَست کہ آئی ءِ مردین چُکّے بوتگ۔ آ سَک گَل اَت، نرس ءَ چُک آئی ءِ دَست ءَ دات۔ آ بے کساس گَل اَت، آ سِیر ءَ پَد ھمے ودار ءَ بیتگ کہ کدی آئی ءَ چُکّے بیت ءُ آ آئی ءَ وتی دستانی دل ءَ کَنت۔
"من مرچی دُگنیا ءِ گَل تِریں مردم آں۔ من وت ھم نزاناں کہ چے کساس ءَ من گَل آں، شَرّیں کہ من دَری مُلک ءَ نہ شُت آں۔ اگاں من بوشُتیناں گڑا، مرچی اے وشّی اے کساس ءَ من ماراِت کُت نہ کُتگ اَت۔ مرچی من سَک گَل آں۔" جسٹس چُکّ ءَ چارگ ءَ اَت ءُ ھبر ءَ اَت، اے منی رنگ اِنت اگاں ایملیہ ءِ!
ایملیہ اَنگت ھوش ءَ نیتکگ، ڈاکٹر ءَ گُشت دَمانے ءَ پَد آ ھوش ءَ کئیت۔ جسٹس شُت ڈَنّ ءَ لھتے چیز ءِ گِرھگ ءَ۔ ھرچ چیزے کہ اَلّم بیتگ جسٹس ءَ ھمے دمان ءَ آؤرتگ۔
ھمے نیام ءَ، ڈاکٹر کہ بیگواہ اَت آئی ءَ جیڑ اِت کہ چوں اِیدا چہ دَر بہ کپاں، آئی ءَ زانتگ کہ ایملیہ ءِ چُک ماتی ءِ وھد نَزّیک اِنت۔ پمیشکہ آئی ءَ لُوٹ اِت کہ ایدا چہ دَر بہ کپیت ءُ نادرہ جاہ ءَ آئی ءِ مرد ءَ گوں دُچار بہ کپیت۔
"مارا اِیدا دارگ واستہ ترا چینچو زَرّ رَستگ؟ وتی کیمت ءَ بوگُش ما دو ھمینچو ترا دئیں۔" ڈاکٹر ءَ گُشت۔ آ تُرسگ ءَ اَت جُست ءَ اَت بلے آئی ءَ وتا ڈَڈّ کُت، ءُ وھدے آئی ءَ ماراِت کہ بیگواہ کنُوک آیاں ھِچ وڈیں تاوان دیگ ءَ نہ اِنت۔ آئی ءَ تھنا ایملیہ ءِ گُشئگ ءَ آاِیدا داشتگ اَنت دانکہ آ چُک مات بہ بیت۔ بلے ڈاکٹر ءَ نادرہ جاہ ءَ رؤگی اِنت دانکہ ایملیہ ءَ بیر بہ گِیپت، بَھتے زُور اَت کہ بیگواہ کنُوک ءَ ڈاکٹر ءِ سودا مَنّ اِت۔ آ رازیگ بیت کہ آیانی یلا دیگ ءَ، زَرّ ءَ وتی زُور جَت۔ آئی ءَ وَ زَرّ لُوٹ اِیت، دِگہ کار ءَ گوں آئی ءَ کار نیست، تھنا آئی ءِ کِیسّگ گرم کنگ لُوٹ اِیت۔
"تو چینچو دیگ لُوٹ ئے؟" جِیک ءَ ڈاکٹر گُشت۔ آ کندگ ءَ اَت۔
"من ترا سئے ملین دیاں، مارا سئیناں یَل بدے۔" ڈاکٹر ءَ گُشت، آئی ءَ زانتگ کہ ایڈنہ ءُ جیری آئی ءَ ایملیہ ءِ ھلاپ ءَ آئی ءِ مرد ءِ دیما کُمَک کناں، وھدے آ ایملیہ ءِ رازاں پاشک کَنت۔ آئی ءَ جیڑاِتگ اَت کہ آ اے دوئیناں وتی ھمرائی ءَ نادرہ جاہ ءَ بارت گوں دانکہ آئی ءِ مرد ءِ دیما درائیں رازاں پَدّر بہ کَنت۔ پمیشکہ آئی ءَ جِیک ءَ اِشانی یَل دیگ ءِ واستہ ھم گُشت۔ جِیک ءَ مَنّ اِت ءُ سئیں یلا دات اَنت۔
ڈاکٹر ءَ زَرّ جِیک ءِ اکاؤنٹ ءَ راہ دات اَنت ءُ دیم پہ نادرہ جاہ ءَ دَراَتک اَنت۔
"یات بدار اِت کہ مارا شمارا ایملیہ ءِ دروگ دیما آرگی اَنت۔ ءُ چُک وتی ھَکّیگیں پِت ءِ کِرّ ءَ بُروت وھدے آئی ءِ مرد آئی ءَ یلا دَنت۔ مھربانی بہ کن اِت، ھمے ھبر ءِ سرا بُوشت اِت۔" ڈاکٹر ءَ جیری ءُ ایڈنہ گُشت اَنت، آ سَک تُستگ اَنت کہ آ بیگواہ کنگ ءَ پَد سَک بے وڈیں جاہے ءَ دور دیگ بیتگ اَنت۔ درستاں چہ ایملیہ ءَ بیر گِرھگی اَت پمیشکہ آیاں یکّے دومی ءِ گوما تِپاک کُت۔
زُوت آ نادرہ جاہ ءَ رَست اَنت، ڈاکٹر تہا شُت ءُ جسٹس گُشتے کہ ڈَنّ ءَ پارکنگ ءِ نیمگ ءَ بیا۔
"لھتے گَپ اَست، بائدیں تو آیاں سرپد بہ بے۔ اے گَپ تئی چُکّ ءِ بابت ءَ اَنت۔ من لوٹاں تو دلگُوش ءَ گْور بہ کن ئے کہ اشی ءِ نَپ تئی وتیگ اِنت۔" ڈاکٹر ءَ گُشت۔
ھپتُمی بھر ءِ ودار ءَ بہ کن اِت۔
The Family Planning
نبشتہ کار: ازرائیل یوزُلَر
رِجانکار: رُژنا بلوچ
